JEAN DJUDIA: Un ombre ke troko el modo de vistimyenta

Metin DELEVİ Judeo-Espanyol
4 Mart 2020 Çarşamba

El 26 de Febrero, selebrado komo el “Dia de Levi Strauss”, es el dia, en 1829, ke marko el nasimyento de la era de los jeans. Nasido en Bavyera - Alemanya, Levi Strauss emigro, djunto kon su madre i sus dos ermanas, a los Estados Unidos kuando teniya apenas 18 anyos. Aya se toparon i aunaron kon sus ermanos ke aviyan emigrados mas antes i ke aviyan empesado un negosyo de grosisto de produktos sekos en la sivdad de Nueva York: J. Strauss Brother & Co. Kuando la ermana i el kunyado de Levi se mudaron a St. Louis, Levi se mudo a Louisville, Kentucky. Aya empeso a vender los produktos del negosyo de sus ermanos. La famiya desidyo avrir un departamento en franchise en San Francisco. Akeyos tyempos esta sivdad se aviya echo el sentro de la “fievre del oro” de Kaliforniya. Levi tomo un vapor a San Fransisko sovre el rio de Missouri i arivo en Marso de 1854 para toparse kon su ermana i kunyado de St. Louis, ke aviyan mudado a San Fransisko unos kuantos mezes antes. En primer echo,  Levi ayudo a estableser la Kongregasyon Emanu-El, la primera sinagoga en San Fransisko.

Levi Strauss & Co. trusho artikolos del magazen de sus ermanos de Nueva York, i ansi ofresieron produktos komo ropa para vestimyenta, ropas de kama, penyes i furchas, chantas i ridas.

Un dia, la mujer de un oduncu disho a un shastre lokal, Jacob Davis, ke los pantalones ke uzavan los lavorantes no turavan muncho. Las kusturas se estavan avyendo. El Sr. Davis izo un par de jeans de kot-denim merkado de Levi Strauss i uzó klavos de kovre para renforsar las kusturas. I ansi empeso el empleo i la moda de jeans. La demanda de estos muevos pantalones jeans fue mas grande ke la produksyon ofresida, i Davis, ke era un kliente de Strauss, le demando a Strauss ke le ayude finansyalmente su tentativa para patentar su muevo invento de shastreriya i ayudar a la konstruksyon de un atelye mas grande. Los dos ombres se izyeron haver en Levi Strauss & Co. El muevo model de pantalones de lavoro fue patentado en 1873.

Levi Strauss muryo el 26 de Septembre de 1902 i fue enterrado en Colma, Kaliforniya. Desho su kompanyiya a Jacob, Sigmund, Louis i Abraham Stern, sus kuatro sovrinos. En el momento de su muerte, su patrimonyo valiya kaji $6 milyones de dolares, el ekivalente a $174 milyardas en “dolares de 2020”. Ayudo ovras de byenfezensya para huerfanos, i la Fondasyon Levi Strauss izo una importante donasyon a la Universidad de Stanford.

 

Siz de yorumunuzu yapın

Tüm Yorumları Görün