Lo ke komyeron muestros padres

Judeo-Espanyol 1 yorum
12 Şubat 2020 Çarşamba

İsak Eskinazi

La komida, mas ke un material de sovrebivir, traye los pueblos en komunidad, formando una sensibilidad de famiya i ermandad kon su rikesa de kolor, savor i kultura.

Uno puede dizir mizmo ke la komida es una de las kolumnas del nasyonalizmo. La komida sirvyo tambien komo arte kulinar, komo pasyon i komo profesyon.

La forma de preparar la komida, kreyemos ke no troko muncho desde la epoka ke el ombre bivyo en las kuevas i aso la karne en la lumbre.

Lo ke oy yamamos, “türlü kon karne”, se aziya aze mas de 8000 anyos. Esto lo vemos en la istorya de la boda de Yitshak Avinu kon Rivka. La komida de lentejas se konose desde aze mas de 2000 anyos.

Tenemos reseftas de la Epoka Romana ke mos avla de komida de peshkado o de karne de kordero abafado. Komida echa kon masa reyena de verduras, se aziya aze mas de 4000 anyos. Ni avlar del pan ke se konose desde ke empeso la umanidad.

El konsumo de kezo se save desde ke el ombre empeso a bever leche. Azer kon el kezo diferentes platos i mizmo dulsuryas ya se konosiya aze mas de 5000 anyos. Los arkeologos pensan ke las dulsuryas de kezo las mas viejas ke se saven, son de la izla de Samos ke esta djusto enfrente de Kuşadası. I esta dulsurya se dava a los atletes ke koryeron en la primera olimpiada ke se izo en el anyo 776  antes de muestra era.

En el livro de Atheneus, ke eskrivyo en el anyo 230, vemos tambien resefta de dulsurya de kezo ande metian guevo al kezo en pure.

El arroz kon el nombre de Pilaf viene de Persia ande metian al lado del arroz verduras, karne o peshkado kon munchas plantas aromatikas. El Pilaf se konsume muncho en India, ande  lo yamaron “Pulaka”, ke kere dizir “bala de arroz”. Se save ke el arroz se konsume en China aze mas de 13.000 anyos. Es de aya ke paso a India, i despues a Persya ande del Sanskrit “Pulao” ke se troko en “Pilaf”. En el siglo 7 de muestra era empesaron a meter Safran i mas plantas aromatikas ke oy yamamos a este plato “Buryan”. Oy en diya tambien, este arroz, dyo luz a “la paeya” de los Espanyoles.

Deshar el peshkado en la sal i komerlo krudo, tambien se savia de muncho antes. Los Bizantinos yamavan este peshkado salado “Garum”. Los arkeologos enkontraron tinajas yenas de “Garum” en Pompei devido a la erupsyon del volkano Vezuv, en Napoli.

A mi me parese ke el  nombre de muestro savrozo “Garato” esta muy paresido al nombre viejo de “Garum”.

Oy la resefta de komida la mas vieja mos yega de la epoka de Hammurabi, rey de Babilonya, ke bivyo 3750 anyos antes. Es en una de las tavliyas de barro ke enkontramos 40 reseftas diferentes. Las eksplikasyones son en letras kuneiformas.

Ke tengamos buena salud, apetito  i buen umor  para gozar de los platos savrozos de muestra kozina.


Siz de yorumunuzu yapın

Tüm Yorumları Görün