Despues de komer de midi el otobus salyo a kamino para ir a la sivdad de “Fez”. “FEZ” es la tresera grande sivdad de Marocco.
“Medina” es la rejyon vyeja de Fez ke esta tomando parte en el “Unesco de la Erensya Mondial”. En Medina ay 9700 kalejikas estrechas i 13000 magazenes chikos. Se puede entrar a “Medina” de 14 puertas diferentes kon arkos. La puerta la mas emportante es la puerta de “Bab Boujloud” ke es entornada de fayanses turkuazes i multikolores. Esta puerta es el simbolo de “FEZ”. En estas kalejas estrechas ay: marangozes, ombres ke lavoran kon fyerro, kon kueros, kon tapetes…
Despues arrivimos a “Meknes”. “Meknes” se topa en el korason de Marocco. Es una de las sivdades ke era la kapital del “Sultanato de Marocceos” durante una larga perioda.
La puerta “Mansur” es la mas grande en el pais i la mas fasinante. Las paredes, los mozaikes, las fayanses, las kolonas, forma de Korint, ke se topan en las dos partes del edifisyo se trusheron aki de un palasyo de “Marakesh”.
En el doredor de “Meknez” ay munchos arvoles de azitunas i vinyas de uvas. Kaminimos el charshi de Meknes.
De aya ayegimos a “Mellah”, la rejyon ande biven los djudyos. Era una rejyon ande durante 7 syeklos los djudyos bivyeron, la kaza del Hahambaşı, la Sinagoga i el Simeteryo se topan aki. Es el edifisyo el mas somptuozo yeno de la kultura musulmana.
A la fin de tres oras de kamino arrivimos a “Marrakesh” i empesimos a kaminar la sivdad. En primero la “La Meshkita Koutubia” ke es un edifisyo monumental. Es el simbolo de “Marrakesh” i se ve de todos los lugares de la sivdad. Esta meshkita se konstruizo en el 12 en syeklo, tyene 77 metros de altor, es echa kon la arkitektura Marokana, i kon la Minare famoza es la mas grande meshkita de Marrakesh.
“Marrakesh” es la primera kapitala de Maroko. Se yama la sivdad ruvya porke la kolor de la tyerra es ruvya. En la lingua de los berberis, Marrakesh tyene el senso:
“La tyerra del Dyo”.
Kontinuimos muestra vijita de Marrakesh kon el “Palasyo de Bahia”, un palasyo somptuozo ke se konstruizo en el 19en syeklo. El senso de la palavra “Bahia” es briyo.
Marrakesh kon la kolor de tyerra, kon el sol ke no entra en las kalejikas i kon los labirentos es la mas ermoza sivdad de Maroko. Aki puedemos ver la kultura Islamika i Marokena.
Aryento, el palasio tyene 160 kamaretas i la persona se puede peryer entre los koridores. Los techos de las kamaretas echos kon una finor de la arkitektura marokana. Tyene una guerta maraviyoza. El peyzaj i las rozas una lokura…
El bazaar de Marakesh, la plaza de “Jemaa el Fna” se topa oy en diya en la lista del “Unesco del Patrimonyo Mondyal” es la plaza la mas vibrante de Marocco.
La noche asistimos al Show “Chez Ali” veramente fasinante.
La sinagoga “Slat Al Azama” yeno de dokumentos kontando la istorya de los djudyos, fotos, videos. El edifisyo, las kolores, la guerta chika vale la pena de vijitarla. A la fin de la vijita de Marrakesh al otobus i tres oras de kamino fina Kazablanka.
“Kazablanka” es la sivdad blanka i la mas grande de Marocco. El porto prensipal i el sentro de finansas. El primer lugar ke kale vijitar en “Kazablanka” es: “II. Hasan Camii” (la meskita 2. Hasan). La popülasyon de “Kazablanka” en 2016 era sesh milyones. El porto de esta sivdad, es uno de los mas grandes portos artifisyales del mundo.
“II. Hasan Camii” es la sigunda grande meshkita del mundo, despues de la meshkita de “Mekke” i fue konstruizado por un arkitekto fransez ke lo termino en 20 anyos. Es el edifisyo el mas emportante de “Kazablanka” ande pueden orasyonar 105.000 personas.
Las broderias komo dantelas en las puertas veramente estan kortando el suluk de la persona de ver esta ermozura.
El arkitekto fransez disho antes de azer esta struktura: “Kero azer una meshkita enriva de la agua, porke el trono del Dyo esta enriva de la agua”. “Akeyos ke ven la grandeza del Dio enriva la tyerra, tambyen pueden apresyar la grandeza i la fuersa ke tyene, en el syelo i en el oseano”. Una ovra grandiosa i maraviyosa ke vale la pena de vijitarla.
A la fin este viaje fruktuozo se termino, i tornimos a muestras kazas kon muy ermozos rekordos.
“Cako Uyar” i “Mordo Hazak” ke syempre tengash azlaha i beraha i puederemos asistir a los viajes inolvidavles ke estash organizando kon muncha atansyon i perfeksyonizmo.
