La Kontinuasyon del Viyaje: RONDA i MAROCCO

Judeo-Espanyol
8 Ocak 2020 Çarşamba

 Al dia sigiente, salimos de Sevilla para ir a “RONDA”, ke es un kazal de 35.000 personas en Malaga. Es una rejyon vyeja de la Espanya entornada de montanyas i el Kanyon de “El Tajo” es el lugar ande vimos peyzajes fasinantes.

“RONDA” es dividida en dos: la sivdad vyeja i istorika, i el Mercadillo, ke es la sivdad Moderna. “El ponte Nuevo” es el sembol de la sivdad. Este ponte esta atando los dos lados del kazal. El kampo de toros el mas vyejo, “Plaza de Toros” se topa en Ronda. La arena tyene una kapachita de 5.000 personas. Es uno de los mas vyejos kazales de Andalusia. Las kazas blankas ke estan enriva de los pinyaskos, la vaye debasho del ponte de pyedras i el rio ke esta koryendo profundamente, empresyonante kon vista ermoza. Las kazas ke estan konstruidas al bodre de los pinyaskos, estan dando el sintimyento ke se van a kayer al abismo.

Este kazal fue el lugar de inspirasyon de los artistos i fue el lugar ke aksepto los envitados famozos komo, Ernest Hemingway ke eskrivyo en Ronda el livro, “Por ken estan Sonando las Kampanas”. Las sinizas del eskrivano, el direktor, el aktor Orson Welles estan enterradas en la guerta de su amigo toreador, Antonyo Ordones.

El ponte Nuevo tyene 120 metros de altor i es uno de los mas grandes pontes de Espanya. Se konstruyo en el anyo 1751 i se esta empleando por butos diferentes. Se topa aki un muzeo i una prizyon. El ponte vyejo es el ponte ke se konstruyo en 1616 i tyene tambyen 120 metros de altor.

Las personas pueden vinir aki a pye i kontemplar el peyzaje ekstraordinaryo kon las vedruras i las montanyas al dorredor. Es un edifisyo el mas grandiyozo de Ronda. La istorya de “Ronda” se va fina los siglos Neolitikos. Aki bivyeron los Vizigotes, los Andaluses i los Romanos.

Despues de midi el otobus mos yevo al porto de “Tarifa”.  Mos suvimos a un feribot en el Gibraltar i komo una ora despues arrivimos a Tandja en Marocco.

Gibraltar es el lugar de rankontro de la mar i del oseano. Gibraltar ata el oseano Atlantiko kon la mar Mediterraneo; tyene 60 m. de largor i 44 km. de anchor. La profondor es komo 426 m. Su lugar es muy emportante en el punto de vista politiko. Este garon separa la Evropa del kontinente Afrikano.

La soverenedad esta en los paises Maroko, Espanya i la Ingleterra. Kada anyo 7.500 naves pasan de Gibraltar i el kontrol de esto esta en la Ingleterra.

Tandja es una sivdad ke se topa en el bodre de Gibraltar. Kaminimos el bazaar de Tandja mizmo komo el de Estambol. Ombres barvudos, golores, suzyedades, todo en medyo de ariva abasho sin dinguna dispozisyon, ma estava enteresante.

La noche el bodre de mar illuminado, la marina, las kazas, los oteles, la luna sentiyando, vista de ver… “Tandja” es la sivdad la mas serka de la Evropa. Se konstruyo al bodre de la mar enriva de las kolinas. Musulmanos, Kristyanos, Djudyos i munchos de paises diferentes, a lo largo de la istorya influensaron los eskrivanos, los poetas i los artistas. Tandja es una sivdad ande munchos filmos nasyeron. Komo egzempyo vos puedo dar el filmo de Leonardo di Caprio ke djugo komo artisto prensipal, i unas kuantas serias de los filmos de “James Bond”.

“Tandja” es la sivdad egzotika, la sivdad blanka de Marocco.

a  kontinuar…

 

Siz de yorumunuzu yapın

Tüm Yorumları Görün