12 Ağustos 2020 Çarşamba 15:53

Simha Tora

Eliz GATENYO Judeo-Espanyol 1342 görüntüleme
23 Ekim 2019 Çarşamba

La semana pasada vos eskrivi ke esta semana vos va eskrivir al sujeto de Simha Tora.

Ya savemos todos ke Simha Tora es la fiesta ande se eskapa de meldar la Sefer Tora i pishin detras se ampesa a meldar demuevo del empesijo. Esta fiesta es una alegriya, se kanta i se bayla kon las Sefer Toras en las manos.

En muestra chikes, moravamos munchos judios en Galata.  Komo todos los ijikos, i mozotros mos ivamos a la eskola judiya ke se yamava “Musevi 1. Karma İlkokulu”. En las fiestas no aviya eskola ma malgrado esto todos mos ivamos a los kales. Muestros padres aziyan orasyon ma mozotros los ijikos/ijikas mos ivamos para engleneyarmos. La fiesta ke mos plaziya lo mas era Simha Tora. Porke en lo ke pasavan las Sefer Toras, echavan bonbones de la azara, i mozotros las arekojiyamos kon grande alegriya. Aziyamos yarish ken va arekojer mas muncho. El kal se dekorava kon rozas. I despues ke saliyamos del kal, ke ya eskapava la fiesta todos los ijikos/ijikas asendiyamos kandelas ke se metiyan aryentro de los fenerikos de papel de kolores a kolores. I kantavamos la kantika “Oshi yami koles, syen paras de koles”. Kreyeme ke asta agora no se, kualo kere dizir “Oshi yami koles”… Sera unos biervos en ivrit ke los transformimos asigun lo oyimos. Teneriya una sinyifikasyon por siguro. O puedeser ke son biervos de una orasyon. Lo ke kere ke seya kaminar kon estos fenerikos en las kayes era una alegriya grande. Esto ke vos digo era syenes de kriyaturas, no poko. Todos ama todos teniyamos uno o dos fenerikos en la mano. En denoche areskuro paresiya ke syenes de lusyernagas (ateş böceği) estavan bolando. Yo no oyi en otro payis ke ay este rituel. Tanbien los ijikos de agora no saven este uzo ke teniyamos mozotros. A, vos dizere ke en vezes estos kantes se aboltavan a yoros. Por ke en saltando i baylando kon estos fenerikos, la kandela ke se topava aryentro saliya del lugar i kemava el papel . Alora, grande dezilusyon i grande tristesa, aparte del espanto ke mos ivamos a kemar i mozotros. 

En vezes esta fiesta viniya un poko mas presto, serka la fin del enverano. Mozotros mos ivamos a Yeşilköy por kampanya. Mos kedavamos asta sukot, kuando los tiempos eran ermozos. En Yeşilköy no aviya kal, mos ivamos al kal de Bakırköy. El kal de Bakırköy ke se serro unos kuantos anyos antes teniya  yahides muy  fideles. En Bakırköy i Yeşilköy aviyan buen karar de famiyas judiyas.  Todos eran komo una famiya. Se aziya una suka muy ermoza i kada famiya trayiya una koza para dezayunar en la suka, asigun su spesyalidad. Borekas, bulemas, boyos, tapadas, biskochos de levadura, dulsuryas i mas.

I agora kada kal tiene su suka i sus adeptos. Se fraguan sukas. Es una alegriya spesyala de asentar en la suka i komer todos enjuntos las uvas i las frutas i todo lo bueno ke se topa aya. Arogaremos ke el Dio mos ayege a bivir kon sanedad i pas, kada anyo esta ermoza fiesta.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR