Una istorya trajika de la Tora i El Taanit de Gedaliah (Tzom Gedaliah)

Metin DELEVİ Judeo-Espanyol
8 Ekim 2019 Salı

Se observa el Taanit de Gedaliah para komemorar el asasinato de Gedaliah, el ijo de Achikam, ke meldamos en el ultimo kapitulo del Segundo Livro de los Reyes en la Tora. Este asasinato rezulto en el egzilyo de los djudios ke aviyan kedado en Judea despues de la okupasyon de estas tyerras por los Babilonianos.

Despues de ke el primer Templo, el Beit Hamikdash, fue destruyido en el anyo 586 antes del Kristo, i ke los babiloniyanos mandaron de fuersa a la mayoriya del puevlo djudio a Babilonya, (ke se konose kon el nombre del egzilyo de Babilonya), permetyeron a una chika minoridad de djudios a kedarsen en la Tyerra de Israel. Aparte de estos, los djudios ke aviyan fuyido durante la gerra tornaron i ampesaron a lavorar la tyerra komo agrikultores.

Nabukadnezar, el rey de Babilonya, nomino a Gedaliah para ser el governador djudio sovre la povlasyon ke kedo en Judea. El rey del pais vizino, Ammon, ke rivalizava kon los Babilonyanos por el kontrol de la Tyerra de Israel, lo enkargo a Yishmael, ijo de Netanyah, para abashar Gedaliah.

Yishmael, ke era desendyente del rey David, vino a la sivdad de Mitzpeh i mato a Gedaliah i a todos los ke estavan kon el. Espantandosen de reprezayes de la parte de los babilonyanos por el asasinato del governador desinyado por Nabukadnezar, los djudios restantes fuyeron de la Tyerra de Israel, kompletando ansi el egzilyo.

Meldando la Torah vemos ke pletos i asasinatos entre ermanos djudios syempre rezultaron en desgrasyas i malores. Estos pletos i matansinas empesaron kon Abel i Cain.

El Taanit de Gedaliah se observa en el treser dia del mez de Tishri, el dia despues de Rosh Hashana. Si el tresero de Tishri kaye en Shabat, el taanit se observa un dia despues, el dia de Alhad. El taanit empesa al amaneser i eskapa en la echadura del sol. Ay syertos uzos diferentes. Syertos se alevantan antes del amaneser para tomar un dezayuno temprano en la demanyana.

Este anyo el Taanit Gedaliah era el 2 de Oktubre.

 

 

Siz de yorumunuzu yapın

Tüm Yorumları Görün