El Sekreto Detras La Unidad Del Puevlo Judyo

Dora NİYEGO Judeo-Espanyol
25 Eylül 2019 Çarşamba

En un artikolo ke meldi, el eskritor esta bushkando la repuesta a la kestion: ‘Kualo es el sekreto detras la unidad del puevlo judyo?’

En una asamblea ande reprezentantes de munchas komunidades judiyas asistieron, el eskritor remarko ke todos eran muy diferentes unos de los otros. Ombres vistidos kon vistidos tradisionales ultra ortodoksos, mujeres modernas en vistimientas luksuozas i talones altos, ekstremos liberales, mansevos profesionales en sus vente anyos, retirados en sus sesenta.

Komo pueden estas personas tan diferentes komo forma de vida, anyos i opiniones, unirsen en una sola boz en el mundo entero, ‘la boz de los judyos’?

La istoria de los judyos empeso kon las dodje tribus muy diferentes ke desharon Ejipto, i formaron una aliyansa kon el Dio en el monte Sinai.

La tradisyon de los judyos siempre fue la tradisyon de un solo Dio, mezmo ke uvo diversos opinyones sovre lo ke este Dio kere dizir.

La unidad judia es bazada en la lejitimidad de diskusiones i de diferensyas ke es la fondasyon de muestro puevlo: muestra kapasidad de estar dakordo o de pueder eksplikar al otro ande no esta dakordo.

El eskritor esta kontando una istorya en su artikolo.

Un rey ke biviya en armoniya kon los abitantes lokales judyos, fue konvensido por uno de sus konsejeros ke le disho ke, en un imperyo no deve de aver diferensyas entre la djente. I ansi, este konsejero lo konvensyo al rey de forsar a los judyos de konvertirsen a la relijion del estado.

Un diya, un fabrikante de tapetes le trusho dos tapetes al rey i le disho de eskojer el ke le va plazer.

El primer tapet era de kolor kolorada i kon muy ermozas figuras enriva; uno de los mas ermozos tapetes ke el rey aviya visto fin akel diya.

El rey fue impresionado de esta ovra ma su kuryozidad por ver el otro tapet fue mas grande.

El sigundo tapet estava brodado kon kolores diferntes, kon diversas figuras delikadas, i kon munchos detalyos. Los ilos utilizados eran de oro, de plata i de kovre. Verdadmente estava komo una ovra de arte, impresionante en su ermozura i klaramente muncho mas ermozo del primer tapet.

Furiozo el rey le disho; ‘Ya savias ke iva eskojer el sigundo tapet. Deke me insultates en amostrandome los dos?’

El vendedor le responsio; ‘Sinyor Rey, el sigundo tapet es su reynado riko de diversidad, i de kapasidad. El primer tapet es lo ke su reynado va ser si oye las palavras de su konsejero. Todo lo ke es espesial, todo lo ke es diferente, todo lo ke lo aze uniko a su estado, va desapareser’.

Al diya el rey anulo la desizion ke el konsejero le aviya rekomendado.

La ermozura del puevlo judyo es komo este tapet. En este tapet, los ilos de diferentes kolores, i de diferentes matyeras se ataron unos kon los otros, i una ovra de arte salyo en medio.

La kapasidad de reunir los miembros de las komunidades judiyas del mundo entero, mezmo siendo tan diferentes, pueder partisipar en un diyalogo sin violensya; esto es la ermozura de la unidad judiya.

Viendo los konfliktos entre los shiis i los sunnis, entre el Fatah i Hamas ke son ermanos, puedemos entender komo de presyozo es el diyalogo entre los judyos.

Muestra tradisyon de diyalogo, i de diskusion es muy poderoza. Esta unidad ke mos vyene de muestra diversidad, es muestro orgolyo. Muestra abilidad de ser respektuozos unos a los otros, es la baza de muestra tradisyon i de la edukasion judiya. Esto es el sekreto detras la unidad del puevlo judyo.

 

Siz de yorumunuzu yapın

Tüm Yorumları Görün