El livro de Ruth

Metin DELEVİ Judeo-Espanyol
19 Haziran 2019 Çarşamba

La semana pasada era Shavuot. Komo en Shavuot se uza meldar el livro de Ruth i komo Ruth se konsidera komo la primera konverta al djudaizmo kije eskrivir sovre su istorya.

Ruth era la mujer moabita de Machlon, uno de los ijos de Elimelech i Noemí, una famiya rika ke se aviya fuyido de Betlehem durante una famina muy fuerte. La famiya de Elimelech se aviya enstalado en Moab, un pais vizino. I este pais teniya una istorya muy larga de konflikto kon Israel.

Kuando Elimelech i sus dos ijos muryeron, Naomi kijo tornar a su tyerra natal. Sus dos ermueras, Ruth i Orpah, desidyeron akompanyar i tornar kon Noemi. Kuando arivaron a Israel, Noemí los konsejo i afilu ensistyo ke las ermueras tornen a las kazas de sus padres i famiyas. Orpah aksepto este konsejo i se fue. Ruth refuzo este konsejo deklarando: “Ande te vas a ir (a Noemí), yo me va ir, tu puevlo sera mi puevlo ... tu tyerra sera mi tyerra i  tu D_o sera mi D_o” (Livro de Ruth 1:16).

I ansi la ermuera i kosfuegra se enstalaron en Bethlehem. Ruth i Noemí tuvyeron una vida solitarya i prove. La povlasyon no aviya olvidado ke esta famiya se fuyo kuando empeso la ambyertura en la sivdad i no se estavan fiyando a Ruth, una moabita. Para no murir de ambre, Ruth estava arekojyendo lo ke kedava en la tyerra despues de la rekolta de la sevada (arpa) en el kampo de Boaz, un paryente de Elimelech. Boaz se apersivyo de las kualidades de Ruth, la modestiya, la fidelidad i la umilidad i la desho kontinuar sus arekojimyentos en su kampo asta la fin de la sezon de rekolto.

De otra parte, los savyos de Bethlehem estavan diskutyendo si Ruth era una konversa verdadera i si podiya kazarse kon un ombre djudio. Ma Naomi saviya ke Ruth era devota i sinsera. Le ordeno a Ruth a partisipar a la seremoniya final de la rekolta i operasyon de sekamyento de la sevada i aya toparlo a Boaz, ke fue tan amable kon las dos mujeres. I kontinuando disho a Ruth ke se prezente a Boaz komo una aspirando a ser su futura kompanyera de vida. I Noemi le aseguro ke Boaz se va enteresar i akseptarla.

La noche, Ruth se asento al lado de Boaz i seryozamente le disho lo ke rekomendo Noemi. Boaz, ke era muncho mas viyejo, muy riko, patron de tyerras i kampos i uno de los lideres de la komunidad, konfeso de una manera modesta ke no se aviya konsiderado komo un posivle kandidato marido asta akel punto.

Boaz i Ruth se kazaron i sus ijo, Oved, fue el grandpapa del rey David. El Livro de Ruth se melda en Shavuot, ke segun el Talmud Yerushalmi, es el aniversaryo del nasimyento i la muerte de David Ameleh.

 

 

 

Siz de yorumunuzu yapın

Tüm Yorumları Görün