Komo se deve komemorar el Olokosto en el mundo entero

Dora NİYEGO Judeo-Espanyol
30 Ocak 2019 Çarşamba

El 27 de Enero es el diya de la komemorasion del Olokosto. Este diya marka el aniversario de la liberasion de Auschwitz en el anyo 1945. Akel diya se aze munchos esfuerzos para rekordar los sesh millions ke murieron en el Olokosto. Kada anyo, se apareja reuniones en las Nasiones Unidas i en las kapitales del mundo entero. En los deskorsos, se da mesajes para prevenir el puevlo kontra el odio i la entoleransia, en amostrando el egzemplo de la trajediya del Olokosto.

Segun el eskritor del Jewish News Service, Jonathan Tobin, todo esto se esta aziendo kon buenas entisiones ma munchas kestiones dainda no toparon repuestas.

La primera koza, kada anyo en el rekuerdo del Olokosto, repetamos la krueldad de los Nazis, i los sufrimientos de las viktimas, ma malorozamente todos los deskorsos no estan satisfasiendo mas nada ke rekodrar los orores. Mezmo si echamos un oseano de lagrimas en el 27 de Enero, o en kualsiker otro diya sovre lo ke afito del anyo1933 fin al anyo1945, estas lagrimas no van a abastar a salvar ni sola una alma de un destino similar. Es ke puedemos evitar un destino similar si la sola koza ke estamos prontos a azer es solo avlar del Olokosto? Malorozamente ke no. Si keremos ke estos eventos entren a la konsiensia del mundo, kale ke agamos aksiones sinyitifikativas.

La sigunda koza es ke, malorozamente la enformasion sovre el Olokosto se konvertyo en una metafora vaziya para kualsikera koza ke konsideramos terrivle. El Olokosto es uniko, i no se puede komparar kon dinguna otra atrosidad ke afita en el mundo.

La tresera koza es ke estamos repetando los sufrimientos de los judios en el pasado komo si no estan akompanyados kon la seguridad de los judios del prezente. Se esta avlando del Olokosto, komo si los aktos del antisemitizmo de oy kontra Israel son permetidos de ser echos. El Olokosto no se esta viendo direktamente relasionado kon la atrosidad de oy en el Medio Oriente. Los judios del Olokosto ya se muryeron, ma los de oy estan biviendo, keren defender sus nasion, i el mundo esta kontra eyos.

Estamos biviendo en una epoka kuando el antisemitizmo esta kresiendo de diya en diya en el mundo entero. La grande parte de este odio por los judios esta eskondida en la “kritika” del Estado de Israel, i el mundo no kere akseptar ke esto es antisemitizmo. Esta gerra ideolojika ke esta bushkando a inyegar los derechos de los judios en sus propria nasyon, es, por definision, un akto de odio por los judios.

Las ekspresiones de antisemitizmo en forma de komentarios sovre Israel, no estan akseptados komo antisemitizmo. Kuando se esta empleyando ekspresiones komo “los judios estan ipnotizando el mundo”, mezmo los miembros del Kongreso no estan akseptando ke esto es antisemitizmo.

Todos los deskorsos de los lideres del mundo entero sovre el Olokosto, son insuportavles porke estan inyorando estas verdades. Sus avlas sovre las víktimas i sovre las atrosidades de Hitler son inutiles si no estan relasionadas  kon una promesa de luchar kontra las kampanyas de boykot, o el terorizmo kometido kontra los judios.

Los ke avlan en el 27 de Enero deven de rekordar ke el solo monumento reel al Olokosto no es estatuas o muzeos sovre la Shoah, ma es el verdadero Estado de Israel ke va ser la garantia del futuro del resto de los judios ke Hitler kijo eksterminar.

 

 

Siz de yorumunuzu yapın

Tüm Yorumları Görün