Ekspresiones Populares en Judeo-Espanyol

Karen GERSON ŞARHON Judeo-Espanyol
14 Şubat 2018 Çarşamba

El Prof. Devin Naar i Ty Alhadeff de la Universidad de Washington en Seattle publikaron un kurto artikolo dando una lista de 11 ekspresiones en Judeo-Espanyol ke son muy popular i dieron sus sinyifikasiones:

1. Ijo de ken sos tu? 

2. Haberes buenos!

3. Dezmazalado de mi!

4. Djente de piron esto me vino interesante de saver ke la djente ke tenian pirones i no solo kucharas eran konsiderados komo djente rika i aristokrata!

5. Kome kon gana! 

6. Engleneate!

7. Hadras i baranas

8. Bavajadas de benadam 

9. Bivas, kreskas, engrandeskas, komo un peshiko en aguas freskas! Amen!

10. Kaminos de leche i miel!

11. Sano i rezio!

Kuando Metin Delevi mos embiyo este artikolo pishin uvo repuestas.

Estas ermozas dichas vinieron de Deni Ojalvo ke eskrivo aki kon mis chikas adisiones:

12. Guay di mi!

13. Lenyo de banyo, hamam odunu!

14. Shastre en pyes, saka en butika, tanyedor en Bedahayim!

15. Kyen se echa kon kriaturas se alevanta pishado.

16. El azno del rey se pisho en mi puerta

17. El azno no lo vites, ni blanko ni preto

18. En boka serrada no entra moshka

19. Azno kayado, por savio kontado

I yo esto adjustando unos kuantos, mis preferidos:

20. Pujados i no amunguados!

21. S’alevantaron los pipinos aharvar el bahchevan!

22. El ken no oye a su mujerika, se trava la orejika!

23. Konsejo de perro viejo!

24. Envejeser i enmaleser!

25. Marido en kaza, dolor de kavesa!

Muestra lingua es muy rika en este modo de ekspresyones. Tenemos livros de proverbos i dichas ke puedesh merkar de muestro sentro. Vos asperamos al Dia Internasional del Judeo-Espanyol/Ladino este Alhad, el 18 Febrero a las 11 de la manyana para pasar un dia entero de alegriyas. Yamame a mi para merkar vuestros bilyetos. 05424258176 Al vermos!