Kedoshim

Rav Yeuda ADONİ Köşe Yazısı
11 Mayıs 2016 Çarşamba

El Todo Poderozo nos esta enkomenda dizyendo; “Devesh ser santos, por ke yo so santo.” Sovre este sujeto kontenua la perasha: “Kada uno i uno devesh tener temor de vuestra madre i de vuestro padre, i guadrar mis Sabatot. Kada persona i persona deve tener temor de su padre i de su madre”. En los dyez komandamyentos esta enkomendansa es dicha “ Onora a tu padre i a tu madre”. Vemos ke padre esta sitado antes de madre. Es muy byen savido jeneralmente las kreaturas tyenen myedo de padre mas ke la madre.

Por esta kavza vino la Tora en la perasha de Kedoshim. Nos enbezo el orden del Kriyador dizyendo devez de tener espanto de tu madre antes de el padre. Pozo a la madre antes de el padre. Kere dizir la onor i el myedo ke vasa tener a tu padre deve ser igual a la onor i al myedo ke vas a tener a tu madre.

La kontenuasyon del verseto es ansi: “Devesh de guadrar a mis Shabatot”. Es defendido de esbivlar el Shabat. En la kreasyon de la persona egziste tres faktores. El Kriyador-el padre i la madre. Por esta kavza es ke vino en un verseto la santedad de El Kriyador, i el konporto ke devemos tener verso nuestros jenitores. Devemos ser personas korektas, i azer syempre lo ke es custo. Meldamos en la perasha, delantre de uno ke no esta atinando no pozes un entrenpeso. Es muy siguro kavzas la kayida suya. Esto puede entender i en este senso; alguna persona ke vino a tomer un konsejo en algun sujeto ke el inyora deves de aklararlo, dizirle lo ke es lo custo i no entronpeselo.

A el lavorante ke ya eskapo su lavoro de vista devesh de pagar su paga i no azerlo sufriyir. Devesh de estimar a tu kapanyero komo tu mismo.

Estas enkomendansas ke meldamos en la Tora, trae a la konpanya pas, repozo i tranquilidad.