El alhad pasado una araba kargada de bombas fue eksplozada por los teroristos en Ankara, en el korason de la kapitala de la Turkiya un diya ande mas de doz miliones i syetesyentosmil mansevos ke van a eskapar el liseo o ke eskaparon el anyo pasado i no reusheron a ser achetados a una universitad i lavoraron un anyo entero para pueder entrar a una de las universitades ke keren meldar pasaron un egzamen muy emportante. I munchos mansevos se topavan en la kapitala en este diya.
Un muzisyen Inglez - ay dos anyos ke mora en Ankara - eskrivyo una letra al publiko i la fraza dalkavo era “Semos Charlie, semos Paris i deke no semos Ankara?”. Esto es un problema importante porke los puevlos evropeos no konsideran la Turkiya komo un pais igual a los de la Evropa. La opinion del muzisyen inglez es porke la Turkiya es un pais de majorita muzulmana. I los paizes evropeos komo forman una union de pezgo kristiana no la achetan; mizmo si tienen razon sovre siertos puntos de vista piedren sus djustedad.
Alhad la tadre, dospues de esta bomba ke fue eksplozada por los teroristos ke no savemos dainda de ke parte fue realizada una otra vez pasimos el tiempo para mirar las enformasyones i los programas politikos en las televizyones. Malorozamente mas de trenta i sinko muertos la mas grande partida mansevos i mas de syen i vente feridos donde a lo manko kinze en una situasyon muy difisil. Malorozamente empesando del mez de oktobre bivimos tres atakos teroristos en Ankara ande mas de syen i sesenta i sinko personas fueron matados por las bombas. Reelmente una situasyon muy difisil por muestro estado kon un terorizmo tanto salvaje.
Kon la gerra ke espero ke se va terminar en la Siria, reelmente la Turkiya bivio i esta biviendo problemas muy importantes kon serka de tres miliones de imigrantes Sirianos ke no pueden lavorar dainda ofisialmente. En siertas sivdades serka de la Siria estan kontando ke no es posivle de kaminar en la kaye kon una bolsa porke mizmo si no ay una koza importante adyentro uno te la puede tomar de la mano. Siertas fabrikas ke no toman este modo de lavorantes ke no son en regla kon las leyes son ovligados de distribuir komidas una o dos vezes a la semana a los ke tienen menester.
Los paizes Evropeos malorozamente no pueden entender el problema ke se esta biviendo muestro pais. Es vedra ke la razon la mas importante para los evropeos es la relijion de estos refujyados. La Evropa puedeser ke tiene razon de no achetar esta kuantitad de muzulmanos porke en sinkuenta anyos kon la proporsyon de nasimiento van a ser un problema emportante para los estados evropeos. La edukasyon i la difikultad de asimilasyon (no de punto de vista relijioza) va ser un modo de propaganda para los partidos politikos. Mizmo esta semana vimos los rezultados en la Alemanya ande la Primera Ministra Merkel esta pensando por los refujiados i esta piedrendo votos en su pais.
Auguramos pas en muestro pais i pas en el Medio Oriente para ke tengamos una vida mas oroza i yena de felisidad.
