El Muzeo de los Djudios Turkanos en su muevo “Templo”

Silvyo OVADYA Köşe Yazısı
3 Şubat 2016 Çarşamba

Este alhad en el 3er dia del Djudeo-Espanyol / Ladino va avlar unos kuantos biervos sovre “Los Elementos Sefardis del Muzeo de los Djudios Turkanos”. Dospues ke el muzeo fue transportado del Zulfaris al Neve Şalom kreo ke la koza la mas importante va ser la fasilidad de pueder vijitar. Malorozamente el Kal de Zulfaris se topa en un lugar ande no es posivle de parkar el otomobil. En el doredor del Neve Şalom se topa lugares para salvarse del otomobil ke tenemos de menester.

En el empesijo no era de esta idea. No estava pensando ke el Muzeo deve de ser transportado. Ma agora esto pensando diferente dospues ke tuve la posibilidad de vijitar dos vezes el muzeo en su muevo templo i vide ke realizaron una maraviya. El lugar esta mas ancho i ay mas munchas posibilidades para ekspozar los objetos i los dokumentos. En esta instalasyon vemos siertos elementos ke aze mas atraktivo el muzeo. Ma kale dizir ke devemos ayudar el muzeo para tenerlo mas riko. En el segundo etaj se topa una meza kon un kompyuter ande ay la karta jeografika de la Turkiya i en la sivdad o el i ke keresh puedesh topar fotografiyas. Ma oy en diya estas fotos no son bastantes. Alhad dospues de mi segunda vijita oy les embiyi sinko fotografias de un edifisio ke se topa en un kazal de Diyarbakır ke se topa serka de la Siria i del Irak. Lavorando por la komunidad tuve la posibilidad de topar fotografiyas del Kal de Unkapan ke se topava ensima de la mar serka del ponte Atatürk en el Kuerno de Oro. Oy el Kal de Selaniko malorozamente no egziste mas. Los ruines dalkavo fueron barridos por los lavorantes de la munisipalidad para ke no se tope las fondasyones de un edifisio artistiko! Unos kuantos anyos antes kuando kijimos restorar esta Sinagoga topimos un alay de fotos en el Sentro de Investigasyones Almana ke es un sentro ande se puede topar fotos para todo modo de edifisyos. La primera koza ke devo de azer es de topar estas fotos i de embiyarlas al Muzeo para ke tope lugar en el kompyuter. Esto se puede realizar kon el ayudo de todos. Oy es muy kolay de embiyar una foto kon e-mail. Si la eksplikasyon es djusta no ay dingun problem.

En el muzeo se topa un segundo kompyuter en la pared ande se topa los anyos komo 1930-1940-1950… En kada data es posivle de topar todo modo de evenementos; de las kozas pozitivas asta las kozas negativas komo las vente klasas o el evenimiento del 6 Septembre (1955) mizmo si no es un evenemento ke era kontra los Djudios ma sienes de magazenes de patrones djudios fueron yagmaladeados. Deke ke no se tope una fotografiya de la kaleja de Pera delantre del magazen de Lazaro Franco ke vendia todo modo de ropas de mobles (mefruşat).

Si vijitamos el muzeo i los ayudamos para los evenimientos i sus fotos en poko tiempo va ser una maraviya.

Vozotros ke estash meldando este artikolo sosh personas ke pueden saver mas i ke pueden tener mas munchas fotografias. Si siertos no son dispuestos para ir al Neve Şalom pueden telefonar i uno o una va vinir a vijitarvos para tomar las kopias de las fotos. Kale dizir ke no les dishe lo ke esto eskriviendo.

En la pared puedemos topar un posto de televizyon ande mos puedemos ambezar komo se gizan siertas komidas. En los filmos ke izieron kon la maestra Ceni Franko konti mas de trenta komidas del pishkado fina las bulemas; de las koftes de prasa fina el armi de tomat.

Esto es la teknolojia. Kon esto reelmente se puede azer maraviyas. I es posivle de ambezarse todo lo ke keremos.

Ayde es tiempo de vijitar el Muzeo. Esta aviyerto kada diya ekseptado el diya de shabat.