Alhad el 7 tuvimos en muestro pais las eleksones parlamentaryas. Desde 2002, el partido de Djustisya i del Desvelopamyento ke estava en el poder no resivio la majorita de los votos para la kontinuasyon de su poder. Ya savemos ke resivio mas de kuarenta por syen de los votos. Ma esto no fue sufiziente. En el Parlamento Turko, kuatro partidos partajan las sias de la asamblea nasyonal. Durante las propagandas, el Prezidente de la Republika ke es normalmente notral lavoro i demando votos para el partido ke dirijo dodje anyos. En el puevlo avia una reaksyon kontra el prezidente, primero porke no fue reelmente notral i porke kijo azer lo ke keria mizmo si las leyes no le permetian. Su suenyo era de ser Prezidente de la Turkiya komo los Estados Unidos ma de una manera a la turka. Mizmo su partido no kijo esto porke este sistema no puedia ser muy demokratiko. El partido fondado par los Kurdes Turkos: El Partido de la Demokrasia de los Puevlos ke devia tomar mas ke los dies por sien de los votos porke malorozamente kon la Konstitusyon de 1982, tenemos un minimum de votos para pueder entrar a la Asamblea Nasyonal. I los partidos deven de pasar los dies por sien. El partido ke era muy fuerte en el oryente i en el oryente sud de la Turkiya esta vez tomo parte en las eleksyones por la primera vez komo partido. En las eleksyones pasadas estavan dando apoyo a los miembros independyentes para tener trenta o trenta i sinko siyas. El prezidente de este partido Selahattin Demirtaş, mansevo de 42 anyos i avokato ke lavoro toda su vida para los derechos umanos; durante la kampanya elektoral tuvo un gande sukseso. A la fin de las eleksyones este partido resivio mas de 13
por syen de los votos de todas las vandas del pais, mizmo de las rejiones ande no biven kurdes turkos i ke son kontra este partido politiko, i agora son reprezentados kon ochenta sias.
Ke era la razon ke una grande partida del puevlo eran kontra el prezidente de la Republika? Kreo ke una grande partida keriyan un trokamyento i keriyan la demokrasiya; keriyan ke dinguna persona se karisheye a lo ke estan azyendo. No kreesh ke esto dizyendo a los ke matan personas o a los ke se mesklan en los movimyentos anarshikos. Ma esto avlando de los ke no keren kazarsen o de los ke keren parir kon sezaryen o de los ke no keren azer kriaturas. No se si se ve en todos los paizes! Ma en estas eleksyones este partido resivio votos emprestados. De ke partidos? Kreo ke resivieron de todos los partidos. El Partido de la Populasyon Republikana (Cumhuriyet Halk Partisi) ke no reusho a pujar sus votos kreo ke empresto una grande kuantidad de votos. Los rezultados no stan amostrando esto ma en Estanbol sienes de famiyas partajaron sus votos entre los dos partidos para ke el Partido de la Demokrasiya de los Puevlos puede ser reprezentada en la Asamblea. En egzaminando los rezultados puedeser no se esta viendo la pujita de los votos del Partido de la Populasyon Republikana ma esto se save en Estanbol. El segundo punto es ke los relijiozos Kurdes esta vez trokaron sus ideas i pasaron al lado del partido de la Demokrasiya de los Puevlos. Kualo es la razon? Kuando los teroristos atakaron la sivdad de los Kurdes “Kobani’’, sivdad en la Siria serka dela frontiera Turka miles de personas toparon la muerte porke no tuviyeron un apoyo bastante del governo turko. I por esta razon no votaron por el partido de la Djustisia i el Desvelopamyento.
En estas eleksyones vemos ke el partido nasyonal Partido del Movimyento Nasyonal tuvo un grande sukseso porke primero reusho a kreer un atmosfer de pas mizmo si sus miembros pensavan mas militarmente. Es por la primera vez ke los partidos de la opozisyon prepararon projektos ekonomikos para el futuro del pais i estos projektos tuvieron grande entereso.
Kualo va afitar agora? No savemos. Dingun partido tiene la majoritad. Ma en Turko dizimos ke en las demokrasiyas kada vez se topa un remedio. I kreo ke esta vez va ser la mizma koza por ke dingun miembro de la Asamblea va kerer una otra vez las eleksyones.
