Kon el komando del Kriyador rekojo Moshe Rabenu a todo el puevlo Djudyo i les enkomendo por la fragua del Tabernaklo (Mishkan, santuvaryo).
El les dyo a entender kada koza i koza klaramente ke manera tyene ke azerse, i los akavido antes de todo de no ezbivlar i azer ninguna ovra mismo para el Mishkan en diya de Shabat. Syendo este diya es el prinsipal sinyal del Djudaismo. İ todo el puevlo kon muncha kerensya izyeron sus donos para esta ovra santa. I kada uno sigun su posibilidad, i enpesaron a punto en la ovra. Todos los savyos ke no mankavan de entre el puevlo de ombres i mujeres lavoraron en esta santa ovra soto la direksiyon de Betsalel niyeto de Hur del trivo de Yeuda i de Aoliav del trivo de Dan enterval de 5 mezes se termino todo este lavore. I se lo yevaron todo a Moshe Rabenu. I vyendo ke todo esta custo sigun lo enkomendo amostro su kontentes i los bendicho.
Sovre el komando del Kriyador ordeno Moshe Rabenu i el Mishkan fue estrenado en el primer diya de nisan de este anyo. Metyo kada koza i koza en su orden. Las tavlas de la ley ke estavan en su tyenda las pozo diyentro el Aron Akodesh ke izyeron de un syerto palo de Pino muy alavado nombra Shita-Shitim. I kuvyerto de oro por adyentro i por afuero. I los tapo el Aron Akodesh kon el kaporet ke era una tavla de oro godror de un palmo. Despues de azer todo lo ke enkomendo el Kriyador, se kuvryo el Mishkan de una nuve. Esto fue un sinyal por el avinir ke dizde a kel diya todo tyempo ke estava la nuve sovre el Mishkan no se meneyava el puevlo de onde estavan pozados. Kuando se alevantava la nuve se levantavan el puevlo i se ivan kaminando asta ke poza otra vez la nuve sovre el Mishkan, pozavan i eyos.
