Mişpatim

Rav Yeuda ADONİ Köşe Yazısı
11 Şubat 2015 Çarşamba

Si emprestares moneda al prove ke esta kon ti, no le tomes entereso. Si le tomates en prenda el vistido de tu konpanyero, a la tadre se lo retornaras por ke solo akeyo es su kuvyerta, es su vistido para su kuero. En ke dormira? I sera ke kuando esklamera a mi yo oyere por ke so yo piadozo.

En estos versetos de nuestro perasha vemos la enportansa de la Tsedaka.

En el Talmud meldamos ke egziste oço grados en dadiva de la Tsedaka. La Tsedaka la mas valoroza es el ayudo ke se aze kon los menesterozos. Aregalarlos o darles enprestado por sus sustenimyentos, a tanto ke no seyan en estado de esperar sus mantenimyentos de las kriyansas. I otra una manera de dar Tsedaka, de ayudar a los menesterodos es ni le ke izo la Tsedaka va saver a ken dyo, ni el ke resivyo va saver de ken resivyo. Si el menesterozo es mansevo i saludozo le mijor es de toparlo un lavoro para ke se mantenya i mantenya a su famiya.

En la perasha Mişpatim, i tanbien en el livro Devarim en la perasha Ree, vemos klaramente esta enkomendansa, i le enkomendansa de azer bienfezensya. Deves de dar, deves de ayudar, avrir avriras tu mano. No endureskes tu korason ni apretes tu mano verso tu ermano el dezeozo. I el deve bivir kon onor entre la cente. No devemos de deshar a ningunos de irse den puerte en puerte a demandar su mantenimyento. Devemos emprestarle o taparle lavoro por ke se mantense kon onor. Estonses el puede bivir igualmente kon toda la cente, por ke todos nos asemejamos unos kon otros todos somos igual unos kon otros.

Unos kon otros devemos de ayudarmos. No ay dubyo ke kada uno konose su dover de ayudar a los insitasyones. Ma devemos de no olvidar a los menesterozos ke biven en sus kazas i no kitan sus bozes afuera, les estrechuras ke travan cuntos sus kreaturas. Una de las kondisyones de azer bienfezensya es: dize Yirmiau el profeta “aze Tsedaka a el ke es menester de azer dicho de El Kriyador”.