Beşalah

Rav Yeuda ADONİ Köşe Yazısı
28 Ocak 2015 Çarşamba

El puevlo cudyo salyo de Raamses i arivaron a Sukot. Estando en la sivdad de Sukot les apronto el Kriyador de una manera milagroza komo dos pilares, uno de fuego i uno de nuve, ke iva adelantre de eyos. El pilar de fuego ivo kon eyos la noche por arelumbrarlos i el de nuve iva el diya por amostrarles el kamino. El segundo diya, de16 Nisan, enpeso a kaminar delantre el real, el pilar de nuve, i el puevlo se fueron detras de el, i pozo en un luguar nombrado “Etam” ke es en los kavos del dizyerto. De este luguar se puidan ir muy bueno a el monte de Sinay sin pasar por Ruvya, tomando el kamino por la parte de Tsafon de esta mar. Pero el Dyo le enkomendo a Moşe Rabenu ke se tornaron atras de este kamino, i ke apozen delantre de la sivdad Pitom en un luguar estrecho entre la mar ruvyo i la forterisa de esta sivdad del Ejipto i los cudyos izyeron ansi.

Arivando a este luguar, se topa el puevlo de Israel en un estado muy perikolozo. Paro vyendo ke los cudyos tornaron a este luguar.Penso ke estan mareyados en el kamino i no saven por onde ir i vinir, i olvidandose Paro de todos los males ke pasaron por su kavesa, se arepintyo de lo ke izo de deshar i alos cudyos de su tyera i pedrer tantos esklavos arekoje una armada muy fuerte iva presigir a los cudyos i los al kansa en este luguar en el sejen diya ke salyeron de Mistrayim.

El puevlo cudyo se topa en el mas grande dezespero i no save lo ke azer por ke, tomar i gerear kon una armada tan fuerte sin estar eyos aperejados para esto i kon famiyas, mujeres i kreaturas. Fuyir, esto tambien era enposible, syendo de una parte teniyan la mar onda, i de otra parte el fonsado Ejipsyano otros propozavan de mizurarsen kon los Ejispyanos sovre lo ke kere ke seya otros pensavan de ovedeser a sus vyejos patrones i tornar atras a Mistrayim a sus esklavaje.

El Todo Poderozo ya save lo ke aze i le dize a Moşe Rabenu, ke diga a el puevlo cudyo ke no se espanten i ke enpesen a kaminar sovre la mar. El Santo bendicho el le dize a Moşe Rabenu espande tu mano sovra la mar i partilo, i ke kamine el puevlo cudyo por la mar komo fuera tyera.

Moşe izo el komando de el Kriyador i kon un fuerte ayre ke aparejo el Kriyador, se seko la mar komo si fuere tyera. Entraron los cudyos diyentro la mar i pasaron por ayi myentres la noche entera kaminando komo se kamina por lo seko.