Ki Tisa

Rav Yeuda ADONİ Köşe Yazısı
12 Şubat 2014 Çarşamba

Moşe Rabenu suvyo a la punta del Monte de Sinay; el  puevlo lo estavan asperando, la ora ke va tornar. Syendo no les avizo la tornada kuando va ser. Moşe Rabenu estuvo en el Monte de Sinay 40 diyas. El kuarenten diya era el 17 del mez de Tamuz. El puevlo se despero i les paresyo ke Moşe Rabenu muryo. Syendo no tomo kon el ninguna koza de mantenimyento. I viyan ke no abaşava la magna kada diya en el Monte de Sinay. Sovre esto se rekojeron todos i vinyeron delantre de Aaron Akoen dizyendole ke les aga un dyo para ke kamine delantre de eyos. Syendo Moşe Rabenu el ke los kito del Ejipto no saven ke es de el le akonteseriya algun dezastre.

Aaron Akoen ermano de Moşe Rabenu vyendo el estado de el puevlo, i lo ke demandavan era enposivle de azerlo, kijo ganar tyempo por ke el ya estava siguro ke Moşe Rabenu ya va tornar,  dize ke traygan todos lo orejales de oro de sus mujeres i kreaturas. Aaron Akoen penso ke las mujeres i las kreaturas no vana dar sus coyas. Ma la cente ajena ke eran auzados a la idolatriya no tadraron de dar sus coyas.

Aaron Akoen tomo el oro i lo metyo en la lumbre i salyo una forma de una bezero. La cente ke vyeron esta forma de el bezero, se fueron detras de sus vanas Kreyensas.

Aaron Akoen vyendo este dezastre, kijo afalagar a el puevlo.

A la demanyana uvo un grande dezorden entre el puevlo. Moşe Rabenu, i el Kriyador se ensonyaron a este estado de el puevlo.

Moşe Rabenu ke amava muncho a el puevlo Cudyo, roga a el Dyo santo de repintirse de su ravya kon el puevlo Cudyo, por amor de Avraam Yitshak i Yaakov, i tambyen ke no topen de avlar los puevlos ajenos. El Dyo santo kon su buendad se arepyente de su ravya i perdona a el puevlo Cudyo.