REE

Rav Yeuda ADONİ Köşe Yazısı
24 Ağustos 2011 Çarşamba

La peraşa Ree la meldamos syempre la semana de Roş Hodeş Elul.

Tyene grande relasion el kontenido de la peraşa kon el mez de Elul ke lo nombramos tambien Roş Hodeş Rahamim mez de piadadez. El otadijo de la peraşa kon el mez de rahamim de piadadez lo vemoz enel verseto: Kuando vyere en ti menesterozo de alguno de tus ermanos en alguna de tus sivdades, en tu tyera ke el todo poderozo te da, no endureskas tu korason, ni seres tu mano a tu ermano menesterozo, sino ke avrir avreras tu manda el, i enprestar le enprestaras, lo ke tyene de menester.

El savyo Arambam dize, por ke tengamos merito en los diyas temerozos ke son los diyas de Yamim Noraim en el cuzgo ke nos cuzgara el kriyador devemos, muçiguar en la enkomendansa de la Tsedaka.

Todos nosotros somos mantenidos de parte la tsedaka ke nos aze el kriyador. Enel Talmud dize: el mundo entero somos mantenidos kon la Tsedaka ke nos aze el kriyador, los Tsadikim se mantyenen kon las buenas ovras ke eyos azen.

Dunke, todos nozotros rogamos a el sinyor de el mundo entrando a el anyo nuevo por nuestro mantenimyento, por la pas, por nuestra salud i por nuestra vida. Si nozotros azemos Tsedaka a akeyos ke son menesterozos, el kriyador tanbien nos da i nos kumple todas nuestras demandas.

En este mez de piodades el mez de elul nos alevantamos a medya de la noçe a orasyonar en los keilot las orasyones de las selihot-perdonansas. Sirvir a el kriyador es kon afirmar la Tora i las enkomendansas, i orasyonar a el Santo bendiço el. Komo esta diço en la Tora si mis en komendansas afirmares en su tyempo vos vadar las luvyas... La orasyon es por demandar mersedes de el kriyador malgrado ke no lo meresemas. Por esta razon enel mez de elul muçiguamos nuestras orasyones i la dadiva de Tsedaka por ke tenemos de menester las piadades i la dadiva ke nos rengrasyara el todo paderozo.

La persona kon la Tsedaka ke aze topa el merito de salir inosente enel cuzgo, syendo ke el kriyador aze a el amore mersedes i piadades en vyendo sus buenas ovras ke el aze.

De estas todas palavre se entiyende la enportansa de azer un egzamen de konsensya enel mez de piadades el mez de Elul. Ansi vamos a tener el merito de ser eskritos i siyadas a un anyo muevo, anyada dulse yena de pas, salud i repozo. Amen.