Teruma

Rav Yeuda ADONİ Köşe Yazısı
2 Şubat 2011 Çarşamba

İavlo el Kriyador a Moşe; Avla a los ijos de Yisrael i tomen por mi apartadura, de todo varon ke su korason enveluntara. Tomaresh mi apartadura, i esta es la apartadura ke tomaresh de eyas, oro plata i alambre.

Şelomo Ameleh dize en el livro de Mişle; tomad mi kastigeryo i no plata mijor es de tomar un kastigeryo bueno ke vale mas de el oro i la plata. Kon este verseto nos kijo enbezar Şelomo Almeleh a nozotros ,mas vale en buen konsejo ke el oro i la plata. El konsejo i el kastigeryo se deve resivir kon alegriya i no kon haraganedad. Kuanda va azer la persona una enkomendansa de el todo poderozo, lo deve de azer kon entisyon buena i alegriya. Afirmar una Mitsva semejante tyene grande valor.

Mismo tyempo la Tsedaka, la dadiva ke aze la persona a los menesterozos la deve de azer kon una alegriya grande ke el Kriyador lo ayego, i le dyo la posibilidad de azer la mitsva de dar Tsedaka. La Tsedaka ke se aze por razon ke fue aforsado no tyene tanto valor.

Por esta razon la perasha enpesa kon estos biervos. “Toma para mi apartadura. Lo ke vaja apartar para ovras de bienfezensyas se deve apartar a nombre de el Kriyador.

La tsedaka ke va azer el ombre lo deve de saver el Dyo, i el ke esta dando.

Devemos de enkorajor a la cente de azer dar Tsedaka. La enkomendansa la mas grande es dar Tsedaka, i azer dar a otros. En el Talmud dize: Mas valorozo es, lo persona ke da i aze dar tsedaka, i azer dar a otros. En el Talmud dize: mas valorozo es, lo persona ke da i aze dar a otros. La entisyon de el primer verseto de la perasha es: Dize el Kriyador, si apartash la apartadura por fraguar el mishkan el santivaryo ke es nombrado tyenda de plazo por mi nombre, me tomash a mi entre vozotros, i yo moro entre vozotros.

La ora ke se para un menesterozo a el lado de una persona, dize el Todo poderozo yo esto a el lado derecho tuyo. Komo eskrive en el livro de Teilim.

El se para a la derecha de el menesterozo. El Kriyador nos dyo la Tora en Monte de Sinay por amostrar ke el se topa en luguar ke ay cente ke estan estudyando la Tora, i mismo tyempo cente ke estan afirmando la enkomendansa de dar Tsedaka. Kon la Tsedaka santefikamos el nomre de el Kriyador. El ke ayuda a los menesterozos, resive grande rekonpensa de el Kriyador. Si pensamos el ayuda ke azemas a las ovras, a los menesterozos de onde la estamos a ayudar? De le ke nos da a nozotros el Kriyador. Devemos de tener veluntad buena por ayudar, a el ken es de menester. Komo la meldamos i el oro, la plata apartyene ami dize Aşem Tsevaot.