EKEV

Rav Yeuda ADONİ Köşe Yazısı
20 Ağustos 2008 Çarşamba

La persona no bive solamente kon el pan ke kome, sino ke, kon la diça i el orden de el Kriyador bive la persona.

Este pasuk meldamos en la peraşa "Ki lo al alehem yihye aadam, ki al kol motsa pi Ad… yihye aadam."

Los savyos ekspilan, komo la alma ke es spiritual se mantyene kon el pan i la agua ke son kozas materyal. Sino no mos mantenemos no puedemos bivir. La eksplikasyon de esta problema molo eksplikan muestros savyos dizyendo todo modo de bivo ke bive enel mundo es konpuesto de kuerpo i alma. La ley la Tora tyene alma i kuerpo el kuerpo de la ley es, la parte eskrita i entendivle, i la alma de la ley es la partida enkuvyeta ke es la kabola el zoar. Las mitsvot, las enkomendan, sos tyenen kuerpo i alma aplikar, azer la mitsva, la ovra es el kuerpo, la entisyon de azer la mitsva es la alma de la mitsva de la ovra. Las plantas posedan alma i kuerpo komo esta diço en un verseto de el livro Teilin de parte de David Ameleh. Kon el orden de el Kriyador fueron kriyados los syelos, i kon el esprito de su boka todo su fonsado. "Bidvar Ad… şamayim naasu uvruah piv kol Tsevaam. (Teilim 33/6) Kere dizir: Kuando kito de la boka el Kriyador dizyendo: "Ke seya syelo yeirakia", se formo los syelos lo mismo kuando dişo formaremos un ombre "Naase adam" se formo el ombre asoplo el esprito i se konpleto el ombre ispiritualmente.

Tornando a muestro sujeto el pan ke komemos kada diya es konpuesto de alma i kuerpo. El pan es una koza materyel, ma la santedad ke poza el Kriyador i le enkomende a el trigo ke kreska es la parte ispiritual la alma de el pan. De aki se entyende ke le vida de el ombre esta dekolgada enel pan ke bendize el Kriyador. El mantenimyento de el ombre es "Ruhani" İspiritual.

Si tomamos por prova la magna "Man" dize el Kriyador por ke te anbezes ke la vida de el ombre no esta dekolgada solamente en la parte materyal de el pan sino en la bendisyon ke poza el Kriyador enel pan te ize Komer kuarenta anyos enel disyerto la magna "Man" la parte divina es, ke mantyene a el ombre.

El eskopo de el mantenimyento de el ombre es, de pujar i entrar a el kuerpo i a la alma, la diça i el orden de Dyos. Ansi puedemos entender ke la vida estava dekolgada en la magna ke abaşava kada diya enel dizyerto kon la bendisyon del Kriyador.

En el livro "Mayanot anetsah" Konta un kuento: Un cudyo vyene onde el Rav de Bardiçov, i dize, yo no posedo nada, mi kaza esta vaziya sigun la ley devo de kazar a mi ija ke ya esta pasando su edad el Kriyador no deve ayudarme? El Rav le eskrivyo un papel, i se lo dyo en la mano de esta persona i le dişo lo mismo ke esta eskrito en este papel lo vo rogar a el Kriyador. En indose a kaza se bola el papel de la mano I lo toma una persona ke estava pasando. El le roga ke se lo retorne el papel ke es un sekreto, ma la persona ke tomo el papel por kuryozidad melda el papel i se alegra. Le dize a el patron de el papel. El Kriyador me ayego a azer una Mitsva, i tu keres devedarme de afirmar esta mitsva? Deviste le promete de darle todo lo ke tyene menester por kazar a su ija.