Bravo a Muestros Koros, Nes i Estreyikas de Estambol

Silvyo OVADYA Köşe Yazısı
9 Mayıs 2018 Çarşamba

Es kon grande plazer ke me ambezi ke el koro Nes enkavesada por muestro amigo İzzet Bana, resivyo un premyo en la kompetisyon enternasyonal SANSEV ke fue realizada entre el 3 i el 6 de Mayo. Resivieron un premyo porke estavan akompanyados por syertos muzisyenes. I el grupo Estreyikas d’Estanbol resivio el mizmo premyo. Uno o dos mezes antes, estavamos avlando kon İzzet i me konto ke fueron envitados a una kompetisyon de koros. I me disho sin azer las melodiyas para syertos enstrumentos i sin enstrumentos no puedemos tener un sukseso. Le dishe si el menester es materyal no es problem. Ay siertos fones en la Komunidad o ay personas ke keren ayudar syertos proyektos. Avli kon muestro prezidente i reelmente izo todo lo posivle. I kon este apoyo alkansaron a reushir. Felisito İzzet i todas/todos los miembros de los koros.

Malorozamente la kompetisyon se realizo en un lugar leshos; i demandi a Izzet komo se paso i kuantos grupos partisiparon? Me disho mas de 120 grupos de diferentes sivdades de muestro payis i munchos grupos ke vinyeron de diferentes payises. Reelmente era por la primera vez ke estava oyendo esta aktivitad.

Komo estamos yenos a patladear de sintir novedades politikas de muestro payis i internasyonal no tenemos la posibilidad de segir novedades artistikas o muzikalas.

Espero ke despues de las eleksyones vamos a tener un atmosfer mas kalmo ke oy en diya. I las aktividades kulturales van a tomar lugar delantre de los evenimyentos politikos.