La rikeza de los Muzeos

Silvyo OVADYA Köşe Yazısı
7 Mart 2018 Çarşamba

Ay anyos ke so enterasado kon todo modo de kozas antiguas. Livros, dokumentos, kartas postales, objetos (eşya), kozas de todas las epokas. El sujeto el mas importante para mi son las kartas postales judaikas konsernando el Imperio Otomano i espesialmente la sivdad de Salonika (ke es la mas rika en este sujeto). Malorozamente los Djudios Otomanos no se esforsaron muncho para tener fotografias i kartas reprezentando sus instutisyones, sus kales, sus modo de vida, sus eskolas, sus Rabinos, sus evenimyentos sosyales (bodas, bar-mitzvas, djugos de dansas o de folklor). Fotografias travadas dospues de un fuego o dospues de un rash (deprem). Los ofisios ke estavan azyendo en Estanbol o otras sivdades. En Estanbol es posivle de topar solo dos kartas. La primera es “Los sedakeros Djudios” i la segunda es “Tenekeci Hasköylü Sinyor Salamonachi”. Ke dezgrasya, una komunidad de mas de syen mil personas i solo dos kartas reprezentando los ofisios de los djudios en Estanbol. Bueno ke no es la mizma koza por Andirne o Salonika.

En estas vendidades ke se realizan, los fermanes i todo modo de korespondensyas o dekretos o todo modo de dokumentos eskritos en la lingua otomana o ebrea, afirmados por los sultanes, kadis o hahames tyenen una grande valor. Mizmo syertos de estos dokumentos son tomados, para no dizir rovados de siertas sinagogas. I estamos aziendo todo modo de esforsos para rekuperar atras estas valores.

Es unas kuantas semanas antes ke topi una tabela de tavla/arvole kavakada ande esta eskrito “El Sinyor Bentsion Algranati mos izo un dono en la memoria de su ija Sultana, ija de Rosa. La Sinyora Sultana mos desho la vida el 29 Heshvan 5697.” I kreo ke el Sinyor Algranati de Smyrna dyo un dono para meter esta tabela en la Sinagoga. No es posivle de pagar todo lo ke topo. I demandi al grupo de los Konsejeros de muestra Komunidad si alguno keriya merkar esto para azer regalo al Muzeo Djudio. Dyes puntos dospues un amigo lo merko i lo izo regalo al nombre de una famiya ke van a selebrar sus 50 anyos de kazamyento. Ke regalo maraviyozo.

Para terminar, vos va kontar sovre el Muzeo de la Sivdad de las Islas. Keriyan reprezentar la vida djudia en las Islas. I el kal de la Büyükada me dyo un parohet i un Sefer Tora en un estado no muy famozo. I dospues de dos mezes reushi a restorarlos. Vash a ver las fotos i vash a dar karar. Reelmente es muy emportante ke se sepa la vida Djudia en las Islas de Prenses.