Pinehas

Rav Yeuda ADONİ Köşe Yazısı
12 Temmuz 2017 Çarşamba

Ansi avlo El Kriyador a Moshe: “Pinehas, ijo de Elazar, ijo de Aaron Akoen, izo tornar mi sanya, de los ijos de Israel zelando mi zelo entre eyos. I no konsumi a los ijos de Israel en mi zelo. Por tanto di mi firmamyento de paz. I tendra el, i su semen despues de el firmamyento de ke una para syempre”.

Ansi enpesa la perasha de Pinehas. El puevlo Djudyo aserkandose a el Yarden, pozaron en un lugar nombrado Shitim. Los Moavim vyendo ke los ijos de Israel no pensaron de gerrear kon eyos, se aserkaron a los Djudyos. Sovre el konsejo de Bilam ke les dyo a saver ke lo ke se puede venser a este puevlo Djudyo, es kuando reveyan i pasan el komando de El Kriyador, izyeron todo su posivle por azer trazyerrar a los Djudyos. I ke kovdisyaron en sus ijas i sus mujeres de los Moavim. Malorozamente el puevlo Djudyo se desho venser de su negro apetite. I se trazyerraron en este partikular, i no mankaron ke sirvyeron i adoraron tambien a sus idolos, El Kriyador mando una mortaldad entre el puevlo i muryeron vente i kuatro mil personas. En el tyempo ke estava el puevlo atristado, tuvo la ozadiya, un syerto Zimri del trivo de Shimon,  tomo una ija de un grande personaje de Midyan, i se la yevo kon un deskaramyento delantre de Moshe, i todo Israel, en la ora ke todos estavan yorando, ningunos no tuvyeron el koraje de azer nada a este akto.

Un syerto personaje nombrado Pinehas, ijo de Elazar, ijo de Aaron Akoen zelo sovre esta desgrasya i mato kon una lansa i mato a Zimri i a Kozbi bat Tsur. Grasyas a Pinehas ke al punto kedo la mortaldad. I El Kriyador le dyo su renkonpensa a Pinehas. I lo desho bivir munchos anyos. I le dyo la keuna Gedola a su semen.