Mi Artikolo i Muestra Kultura

Silvyo OVADYA Köşe Yazısı
18 Ocak 2017 Çarşamba

La semana pasada malorozamente no pude eskrivir mi artikolo. No se de ke! Mizmo me fui kon mi diksyonaryo al echo para pueder eskrivir aya. Normalmente devia bushkar mi patrona Klara para dizir ke esto muy kargado i demandar si me da la permision de no eskrivir esta semana. Fue mas fasil de bushkar a Virna ke koordona el semanaryo. Kon la publisidad (reklam) de los romansos i del livro de Matilda Koen Sarano; “El Kurtijo Enkantado” me disheron ke no devia tomar la pena (zahmet) para eskrivir. Es djusto ke no tomi la pena ma devia de tomar la pendola (dolmakalem) porke el un tierso de la oja fue kapladeada kon esta publisidad. I si komo una furcha de mi patrona reelmente tiene razon.

 Devesh de saver ke esta oja es un poko para esbafar (içini dökmek) komo lo esto aziendo. La tresera seria de los romansos en Judeo-Espanyol los estamos vendyendo. Agora komo lo meldatesh el livro de Matilda Koen-Sarano va ser publikado en unos kuantos dias i va ser publikado en la memoria del sinyor Salamon Becerano ke fue durante munchos anyos el redaktor responsavle del Şalom i lo mas importante, redaktor de la oja Judeo-Espanyol. Es su ija Lizet (o sus ijas) ke dieron un apoyo materyal para esta publikasyon. I reelmente el Sinyor Becerano meresiya esto.

Kreo ke ay otras personas ke keren onorar sus padres o madres ke izieron munchos esforsos para muestra lingua i kultura … I estamos prontos para onorarlos.

Kada anyo azemos una seduta ofisial de muestro Sentro Sefaradi para eskojer la administrasyon de muestra asosyasyon. I en jeneral no es muy importante esta reunyon. Este anyo fue una okazyon para arekojer todos los miembros de muestra asosyasyon al el dorredor de una meza (ma espero ke va ser una meza grande). Este modo vamos a dar la posibilidad a todos para partajar sus ideas. Vamos a ver lo ke puedemos azer en el tiempo venidero (önümüzdeki zaman).

Oy muestra amiga Dora en muestro grupo de whatsapp estava demandando si vamos a irmos para el Dia del Ladino/Judeo-Espanyol 2017 a Andirne? Le demandi ke pensa por la djente ke van a vinir de otros paizes. Pensavamos este paseo pensando muestros amigos ke van a vinir de otros paizes. Komo pasimos momentos muy rigorozos en muestro pais kreo ke solo pokas personas van a kerer vinir a muestra sivdad para partajar este dia.

Ma para reushir devemos de ser yenos de esperansa i kreo ke vamos a reushir este dia kon munchos partisipantes. A lo manko vamos a azer un teatro shabat la noche i un dia de syete-ocho oras el dia de alhad. Espero de vervos a todos en este dia…