Vayeleh

Rav Yeuda ADONİ Köşe Yazısı
6 Ekim 2016 Perşembe

Kuando eskucharas a la boz de Ad. tu Dyo para guadrar sus enkomendansas, i sus fueros eskritos en este livro de la ley; kuando tornaras a tu Dyo kon todo tu korason i kon todo tu alma. Estos versetos meldimos en las perashiyat de esta semana.

El savyo Hafets Hayim en su livro ‘Torat Abayit’ dize: Kuando nos vamos a enforteser por tornar al Dyo Santo, kon todo nuestro korason, i kon toda nuestro alma, vamos a tener el merito de afirmar las enkomendansas de la Tora. El ovligo de tornar en teshuva, sovre todo en el mez de Elul, ke nos topamos, tambien ke estamos aserkando mas a el anyo nuevo, ya es savido muy bueno, ke devemos de apresurar, de deshar nuestros defektos. Ma malorozamente el apetite malo poza delantre de nozotros entronpesos, i no mos desha pensar a enderechar nuestras kareras. Malgrado todo si viniya un profeta i nos diziya, mirad! Vash a salir kulpozos en el djuzgo enfrente el Kriyador. Estamos siguros devista ke ivamos a tornar en teshuva. E bien por ke razon esperamos al profeta, estamos muy siguros ke ninguna persona no esta korekto verso el Kriyador. La repuesta ke pensamos de dar es ke tenemos la esperansa ke un diya vamos a afirmar la enkomendansa de la teshuva komo esta eskrito en la perasha.

No esta leshos de ti, no esta en los syelos, ke es muy difisil de alkansarlo, ni en el bodre de la mar ke es difisil de toparlo, si no ke esta muy serka de ti, eya esta en tu boka i en tu korason.

Dunke, si no agora kuando?

Si dizimos kuando tenemos tyempo, puede ser no puedemos topar el tyempo, ansi es dicho en Pirke Avot.

El Kriyador ke nos de el merito de tornar en teshuva, i deshar nuestros defektos.

El Shem Yitbarah ke nos de una anyada buena i dulse. Ke enpese el anyo nuevo kon sus bendisyones del presipyo de el anyo asta el kavo de el anyo.