La fin del enverano

Silvyo OVADYA Köşe Yazısı
31 Ağustos 2016 Çarşamba
Este anyo pasimos una enveranada reelmente yena de evenimientos. Ma lo mas importante fue el kavzo de la politika i aktualidad turka. Malorozamente el terorizmo de diferentes partes es una desgrasya para muestro pais. Ay munchos anyos ke en la parte oryental del pais siertas bandas i organizasyones illegales azen munchas negriguras kontra el estado  i el puevlo Turko. Ma los tiempos dalkavo estas negriguras i atakos teroristikos fueron realizadas en las sivdades prinsipales komo Ankara, Estambol, Gaziantep… Sus buto es de dar danyo al turismo turko ke reelmente se aviya enfloresido en los anyos de dalkavo. Los  presyos de los oteles de sinko estreyas se elevo asta €400 la nochada. Ya savesh ke oy si mirash en el booking.com, vente dias resivish kada diya propozisyones de oteles ande miratesh i los oteles ke se topan en las grandes sivdades. Esta semana un grande otel ke es renomado i es situado en Bomonti kosta setenta euros.

El 15 del mez de julio, despues del tentativo de una revolusyon, bivimos dias mas duros. Es djusto ke la ekonomiya del pais kontinua a fonksyonar ma los ekonomistos dizen ke puedemos bivir siertos problemas importantes. El presyo del dolar amerikano ke es un parametro importante esta komo “el Mehter” (en turko el “Mehter Takımı” es una banda ke aze una kaminada dos pasos adelantre, un paso atras i  avansan en un  tiyempo largo!). Se vende kazas kon syen i vente mezes i un entereso muy basho para la lira turka. I este modo keren ke la ekonomiya no se aflake.

Kon el trokamiento de la sezon, espero ke vamos a bivir diyas mas alegres. I oguro ke los problemas militaryos ke bivimos en las tierras siriyanas se van a reglar i vamos a bivir en pas kon muestros vizinos.

Para terminar mi artikolo kon novedades mas amavles i agreavles vos kero avlar del konserto del maestro Giora Feidman ke se va realizar el 19 Septembre a la okazion del “Festival de la Klarineta”. Maestro Giora ke es el rey de la muzika Klezmer estava kon mozotros en Edirne el 15 de Mayo i reelmente bivimos un diya eksepsiyonal kon el i kon Serkan Çağrı ke es un artisto turko ke tanya klarineta. Para tomar las invitasyones puedesh telefonar al Sentro Sefardi (0212 231 83 79 o a la Sinyora Karen 0542 425 81 76) o al Orfelinato (Yetimleri Koruma) para kontaktar la Sinyora Rita. Vos asperamos en muchidumbre al konserto…