İ por eskapar de un mes de Julyo muy trajiko kon: en muestro payis la tentativa de revolta immedyatamente dominada… en la Evropa los atakes terroristos por la mas parte revendikados de parte de la horrivle nebuluza Daesh o perpetrados por jovenes ke avian pedrido la fakultad de djuzgar, penso ke mos seria muy profitavle de retornar inversamente a dos epokas del pasado: la mas serkana en el dyez i ochen siglo, el kual fue nombrado “el siglo de las Luzes” i la mas leshana en los dodjen i tredjen siglos “la Epoka de Oro” .
A notar ke desde la fin del 17en siglo, kon Baruh Spinoza ansi ke otros semejantes savyos…i partikolarmente desde el empesijo del 18en siglo, uvo en el espasyo de la Evropa oksidental una epoka durante la kuala se vido realizarse una fuerte evolusyon sosyal ke deshava preveer el empesijo de una real separasyon entre la Relijyon i la Politika i ke anunsyava la Revolusyon Franseza,
Unas kuantas desenias despues la “epoka Kristyana de las luzes”, durante la segunda mitad del dyes i ochen siglo, ‘Mozes Mendelssohn’ fue a su torno uno de los mas grandes defensores de la Haskala, la kuala fue la epoka de “ Las Luzes Djudias en Evropa”.
Partizano entuzyasto de la emansipasyon djudia sin a ningun momento trahisar la verdadera esensya del djudaizmo, Moses Mendelsshon fue segun la opinyon de munchos intelektuales “el treser Moise” de muestra relijyon:
a)“Moshe Rabbenu” Lejislador hebreo de la antiguidad, el kual avia resivido en el dezyerto el sublime “Dekalogo” ke fue inkontestavlemente la baza absoluta de la “verdadera sivilizasyon aktual” en todo lo ke eya komporta de ethika i humanizmo.
b) “Moise Maimonide” filozofo hebreo del tredjen siglo, el kual fue uno de los primeros djudyos ke akseptaron el ‘Rasyonalizmo de Aristoteles’ sin por esto nunka renunsyar a su kreensa relijyoza ansestral.
c) “Moses Mendelssohn” filozofo otodidakto del 18en siglo, el kual fue un grande teorisyano de la emansipasyon de los djudyos de Evropa, los kualos entonses eran enfohados en el absoluto kumplimyento de todas las mitsvod i relativamente enserrados fizikamente en espasyos estrechos, leshos de kualkyer grande sivdad.
El tambyen fue uno de los mas eminentes instigadores de la avyertura de muestros korelijyonaryos de entonses a la Syensya, la Matimatika i la Filozofia ansi ke al estudyo de linguas otras kel Hebreo i el Yiddish, espesyalmente del Alman i del Fransez, lo ke fasilito muncho sus kontaktos mas o menos harmonyozos kon los konsivdadinos kristyanos.
Un grande komentador kontemporeano (del kual no me akodro el nombre) avia dicho a este sujeto: ”i dizir ke de este grupo de personas mal vestidas, los ombres kon sus barvas inmensas i sus kaveyos mal penyados, las mujeres yenas de humilidad, iva mas tadre salir una multitud de premyos Nobel”.
Revinyendo a Moses Mendelssohn, el nasyo en Dassau durante la primera mitad del dyez i ochen siglo, el 6 septembre 1729. Su padre era un simple eskritor publiko ke parvenia kon grande difikultad a asegurar el mantenimyento de la famiya, i es ansi ke en su chikes, alimentado de una manera insufizyente, el futuro grande ombre de sehel devino rashitiko i mas tadre korkovado..
Finansyeramente muy prove para pueder frekuentar kualkyer eskola, el fue en su chikes edukado por su padre i el Rabino David Frankel el kual lo izo estudyar no solo la Biblia i el Talmud ma tambyen la filozofia de Maimonide.
Ansi, kuando el Rabino David Frankel fue yamado en el anyo 1743 a profesar en Berlin, su elevo kon grande prisa lo sigyo kaji immedyatamente aun la inmensa difikultad para un djudyo de ser resivido en la aktual Kapital Almana i pueder asumir sus gastes de komanya.
El fakto el mas sorprendente fue ke todo en luchando syempre kontra la provedad, Moses Mendelssohn topo el tyempo nesesaryo i la enerjia menesteroza para estudyar en mizmo tyempo las Matematikas i el Latino grasyas a su enkontro kon dos mansevos ke lo ayudaron a introduzirse en la esfera kultural evropea de la epoka, lo ke pusho uno de los intelektuales almanes a dizir en riendo: ‘Mendelssohn se ambezo en mizmo tyempo el alfabet i la filozofia’.
El, por egzempyo, se prokuro un egzemplaryo de una ovra de John Lock ( grande eskritor Inglez) ke parvino a estudyar sin konoser la lingua de Shakspear, grasyas simplemente a su chiko diksyonaryo Latino.
La mas importante parte de su erudisyon fue prinsipalmente el fruto de su propya habilidad ansi ke de sus propyos esforsos afin de adaptarse a lo ke era la inmensya evolusyon intelektual de la Evropa oksidental.
En el anyo 1750 (dunke aedado de vente i un anyo) el fue engajado komo preseptor de un adolesente, de parte de un riko negosyante djudyo de seda nombrado İsaac Bernhard ke fue muy impresyonado por la intelijensya de Mendelssohn, del kual el izo tambyen su tenedor de’livros de kuentos’ i mas tadre su propyo haver.
İ kuatro anyos mas tadre en el anyo 1754, akontesyo un djenero de milagro, komo una buelta desiziva en su destino, kuando el tuvo la okazyon de enkontrar i konoser de serka el afamado filozofo alman Gotthold Lessing ke devino uno de sus amigos los mas sinseros.
Sovre estas ultimas palavras me topo personalmente en el ovligo de interrumpir esta primera partida de mi artikolo, kon la esperansa de pueder kontinuar la semana venidera.
