La emportansa de la sanedad

Şeli GAON Judeo-Espanyol
13 Temmuz 2016 Çarşamba

La sanedad no es solamente no tener hazinuras; es estar en una situasyon perfekta sovre los puntos fizikos, mentales i el byen estar sosyal.

La sanedad es un fakto sosyal porke;

• Los elementos ke forman la sanedad son sosyales.

• Las razones ke kreen la chika salud (sağlıksızlık) son sosyales. Entonses;

• La solusyon de tener la salud buena es sosyal.

Estamos bivyendo en un tyempo asigido (çok yoğun ve yorucu), yeno de problemes i yeno de stress.

Munchas bavajadas, estan dirijando muestra vida i mos estamos atristando (üzülmek) por nada, por kozas ke no tyenen emportansa veramente.

Aser ke; kale akseptar la vida i los evenementos buenos u negros komo son, para pueder bivir orozos.

• Tener una enerjiya bastante para no enfluensarse del stress de kada dia.

•  Una atitud (davranış) pozitiva kon el optimismo endjuntos.

•  Ser kalmos en las situasyones urjentes (acil) i inesperadas (beklenmedik).

•  No inyervar a kozas ke no tyenen emportansa.

•  Ser syempre en el mizmo nivel (seviye) de komporto.

•  No bushkar la felisidad en el materyalizmo.

•  No azer kompetisyon (yarışmak) kon el den frente.

•  No enselarse de los otros.

•  Bivir la felisitad de los momentos chikos.

•  No lavorar i no kansarse para azer todo perfektamente.

•  No ansyarse, no enkyetarse (endişelenmek) para todo modo de koza.

•  No ser ingratos (nankör).

La sanedad de la persona es la valor la mas sakra en el mundo.

Malorosamente la persona entyende la valor de la sanedad kuando la perye. 

A mi idea; la kanserya, los penseryos i no pueder solusyonar los problemes; son faktos ke influensan negativamente la sanedad.

No dar emportansa a nada, no pensar muncho, deshar todo asegun es, es la solusyon de estar en ekilibro.

La persona ke es sana es; orozo, bivo (canlı), aktivo i alegre.

La limpyeza, komer lo ke es menester, alimentarse de una manera djusta (doğru beslenme), no bever muncho alkol, no fumar, azer spor, utilizar kuras sin saverisyo enfluensa la sanedad negativamente.

Tener la salud buena no es tener solamente un puerpo sano; en mizmo tyempo es tener la salud mental. La buena salud es; una kondisyon ke tanto muestro puerpo kon muestro mental (zihinsel) estan fonksyonando korektamente.

Una persona ke es sana; tyene la kapachitad de azer todo modo de kozas kon grande aktivitad porke su organizmo lavora de una manera korekta sin problema.

Mentalamente kuando tenemos salud; puedemos realizar munchas aktivitades fizikas kon aktivitades volontaryas para pueder ayudar al den frente.

Para tener una vida kon salud buena; devemos de tener una vida disiplinada, komer kozas nutritivas, azer egzersizos fizikos regularmente… Es emportante de mantener tambyen el mental sano, pensar bueno i pozitivo para tener una vida repozada.

Entonses mi marido Meir, eskrivyo una poezia sovre la sanedad.

UN SUFLO DE VİDA

ES UNA GRANDE ERMOZURA…

BİVİR KON SANEDAD,

SER KON TODOS LOS KERİDOS İ KERİDAS

ESTAREMOS TODOS ENDJUNTOS

KON REFUA ŞELEMA,

KON GRANDE ERMANDAD

İ AMOR DE VİDA...

Keridos Lektores; kedavos en la buena ora kon Salud Buena i kon Felisitad…