La ekspozisyon de ‘la luz’ i de ‘la kolor’

Şeli GAON Judeo-Espanyol
25 Mayıs 2016 Çarşamba

La semana ultima mos fuimos kon una amiga al museo de ‘Sakıp Sabancı’ ke se topa en Emirgan, un lugar maraviyozo del Bosfor.

Una guerta ordenada por un arkitekto ke tyene un gusto muy fino. Los arvoles, las flores multikolor, las statuas en las kuatro partes de la guerta kon un orden ekstraordinaryo.

Una ekspozisyon de ‘Heinz Mack’, ke es un artisto alman; pintor (ressam) i eskultor (heykeltraş), ke aksepto ‘La Luz’; komo el orijen de la vida sin fin (ışık sonsuz bir yaşam kaynağıdır). 

Para ‘Mack’ la ‘Luz’ kontyene i tyene la kapachitad de deskrivir; las kolores de la natura, las formas komo statuas, kolonas…

‘Mack’ nasyo en 1931 en Frankfurt. Tuvo en su karyera de 60 anyos una personalitad enerjika i fue el pionaryo (öncü) del modernizmo alleman. El unisso la luz i la kolor kon una grande armonia i akordo.

Seyga komo artisto (sanatçı), seyga komo filozof (felsefeci), konsakro toda su vida al arte.

Kuando estaj entrando a la guerta del museo keridos lektores; una vista fasinante (mükemmel) vos esta aresivyendo.

El Parko, el Cielo, el Bosfor maraviyozo…

En sus ovras; las luzes estan dominando el dezerto ‘Sahra’ (Sahra Çölü).

El auno la natura i el arte. 

El proyekto de Sahra; tyene komo buto de krear un espasyo (alan) de libertad, de independensya en el dezerto ke se esta espandyendo (uzanıyor) fina la eternidad (sonsuzluk). En este punto de vista la Luz i la Kalmo (sessizlik), se propaja (yayılır) fina la eternidad. 

Los objektos (nesneler) devienen abstraktos (soyut), kon la ayuda de la Luz. Este modo la enerjiya de la natura se aze ver (görünür).

“Las statuas se arrebiven (canlanmak) kuando se topan kon la ‘Luz Derecha’ (doğru). La kavza es; ke las statuas son los instrumentos de la luz i la enerjiya es la ekspresyon (ifade).”

En los anyos 1960, Mack se fue al dezerto Sahra i izo paseos de deskuvyertas (keşif gezileri). Estamos vyendo en la ekspozisyon, dos instalasyones (yerleşim alanı) djiganteskos (devasa) echo kon la arena (kum) del dezerto muy enteresante.

Munchas ovras diferentes una mijor de otra, sovre todo las 9 kolonas de oro ke estan arrelumbradas por las luzes multikolor, veramente una ovra ekstraordinarya. ‘Mack’; esta djugando kon las luzes i las solombras (gölgeler), i las esta refletando (yansıtmak) a las paredes de una manera perfekta i artistika. Despues ke salimos de la ekspozisyon, mos fuimos a komer kon mi amiga en el Bosfor enfrente de la mar. El tyempo dulse kon sol, la mar kalma, los vapores pasando komo novyas, una vista ermoza.

Avlimos sovre los rekuerdos, sovre el tyempo ke esta pasando muy presto, sovre la ekspozisyon enteresante, sovre los problemes del pais ke mos esta influensando negativamente.

Muy kontentes ke pasimos un dia kultural, yeno yeno de ovras ke no somos auzados de ver, tornimos avlando, riyendo…

Mos metimos de akordo para toparmos la semana proksima, para vijitar otro museo u otra ovra kultural endjuntos.