Estamos bivyendo los diyas final de Primavera. Tengo la impresyon ke oganyo, la mueva sezon ampeso mas demprano. Fin de Marso afilu ya aviya arrekayentado el tyempo. Los arvoles todo el largo de muestra kaleja son para mi los sinyos del arrivo de la Primavera. İ eyos tambien, komo un miraklo, ya aviyan ampesado a vestirsen de sus parures de ojas vedres abondantes.
La Primavera azyendose sentir kon el sol amostrando su kara riente. En vezes esta eskondido detras las nuves, ma ansi ke ansi es Mayo i Estambol mos esta arregalando su natura sin igual. Dizen ke sin ver los arvoles de “Erguvan” kon sus chikas flores roz-lila, no se puede afirmar ke ya vino la Primavera. Basta un torno de vaporiko en el Bosfor para bivir esta egzaltasyon i ver estos sinyos espesyal de la Primavera en Estambol. İ aki, una notisya: esta planta es konosida por los estranyeros komo “Judas Tree”.
Otruna flor ke mos anunsya el arrivo de la mueva sezon a muestra sivdad, es la “Tulipa”, syendo tambien uno de los simbolos de Estambol. La vemos en todas las partes de la sivdad kon sus formas i kolores diferentes. Es la flor ke dyo su nombre a una era del İmperio Otomano. Era sitada en la İstoria komo “Lale Devri”…
Entremyentes estuvimos okupados kon los aparejos de “Pesah”. Tuvimos diyas bastante kayentes en Avril, kon un tyempo maraviyozo, el sol briyando en un sielo klaro. La Natura dyo komo un entervalo a la mueva sezon. El tyempo ezyelo un poko, tuvimos diyas enuvlados i luvyas, lo ke es muy normal en esta sezon. Ma, el mez de Mayo mos esta asperando kon toda su esplendor de diyas ermozos. Portanto, no puedemos saver komo va estar kuando meldarash estas linyas…
El sigundo Alhad de Mayo, oganyo el 8 de este mez, se selebra la fyesta de las madres. Mama o madre, un byervo tan chiko, un byervo de kuatro, sinko letras..Un byervo maraviyozo yeno de una sinyifikasyon tan profunda i ke kontiene toda la amistad del mundo i sentimyentos de sakrifisyo sin limitos.
Es verdad ke munchas mujeres no pueden ser madres “biolojikamente”, ma esto sigura ke todas (o kaji) tienen en sus korasones un lugar espesyal para los ninyos, bastante de kerensya para eyos. Porke, esto konvensida ke sentirse komo madre o a lo menos tener sentimientos pozitivos por una kriatura, es una partikolaridad ke se topa en toda mujer.
Ansi, komo dishimos, este sentimiento maternal es una parte enseparavle de la natura de la Mujer. Asigun mi, toda ninya es una potansyel kandidata a ser Madre. İ, en jeneral, toman komo model, sus propias madres, imitandolas inkonsiamente. Las vemos djugar kon las “kuklas”, vistyendolas, aninandolas ets…Si no me yerro, afilu Dalida tiene dicho en una de sus kantikas estos byervos: “MAMAN, quand ma poupée grandira je veux qu’elle te ressemble maman…”. Mama, kuando mi ninya se engrandesera kero ke te asemeje, mama…
En realidad, se puede eskrivir ojas i ojas por las madres. Yo simplemente me vo kontentar oy, de dizir Buenos Diyas a los lektores i embiyar mis sinseros suetos a todas las keridas madres.
TU SOS Mİ MADRE
Tu no sos un nombre en el ayre,
Tu sos rosiyo sovre la yerva vedre,
Tu sos la ke bushko manyana tadre,
Tu en mi korason, sos mi MADRE…
