La Alegria de Pesah

Esti SAUL Judeo-Espanyol
20 Nisan 2016 Çarşamba

El “Arbre de Judée” (Erguvan) se paro de sus floras roz-mov para aparejar la alegria de muestras fiestas sakradas, Purim i Pesah. En el mez de nisan, enflaman los sentimintos del renasimiento.

El Arbre de Judée (Erguvan), toma su nombre de la rejion de su orijen, La Judea. En las alturas del Bosforo se remarkan maraviyozamente entre los pinos i se tornan la kara a la mar Marmara, la djoya de muestra sivdad, Estambol.

Arrimandosen los unos a los otros, ornan las guertas, kaminos o rios, se adjuntan para inspirar los artistos: Eskrivanos, Muzikologos, Skulptores.

Entre las kolores fosforesantes de las yervas freskas vedres, las margaritas blankas parfumadas, el Arvole de Judea se erije, kon su enfloresimiento printaniero rose-pourpre, a plena luz del dia…

Cercis Siliquastrum (su nombre botaniko), apartiene a la famiya de Fabaceae, su nombre en Gresia es Kerkis. Puede alkansar diez metros i piedre sus ojas en invierno.

La kolor, la forma elegante del Arvole de Judea, lo eskoji para suetarvos una primavera prometoza de un enverano de pas i de gozo en los korasones...

“Les coeurs les plus proches ne sont pas toujours ceux qui se touchent.”

Los korasones los mas serkanos no son siempre los ke se tokan.

HAG PESAH SAMEAH.