Si… Komo fue espesifikado en mi artikolo de la semana pasada, a la fin del ofisyo relijyozo de kipur en la modesta kehila ke el avia eskojido para pasar su ultimo dia de djudaizmo antes su konversyon al kristyanizmo, Franz Rosenzweig tomo konsyensya de su djudaidad i se sintyo irreversivlemente atado a munchos de los sublimes preseptos de la relijyon en la kuala el avia nasido. Es verdad ke el kedo syempre alman, ma un “alman djudyo” mos dize uno de sus komentadores.
A la sigida de este imprevizivle retorno espiritual difisil a eksplikar, se puede afirmar ke el sujeto prinsipal ke okupo su esprito fue byen entendido “la esensya del djudaizmo” no solo en el kumplimyento de su ritual uzual, ma en la valor de su rolo de giador en un mundo kaotiko ande El Byen i El Mal paresen munchas vezes mesklarsen ‘el uno al otro’ i no ‘el uno kontra el otro’.
En los anyos ke presedaron de serka la gerra de 1914, la kuala fue un real karnaje, Rosenzweig fue uno de los grandes eskritores djudyos ke se sintyeron konsernados por el destino munchas vezes trajiko de korelijyonaryos ke se topavan en varyos payizes vezinos.
Nombrozos interpretes ke analizaron profundamente su Ovra mos dizen ke el tromatizmo de baza ke pusho Franz Rosenzweig a abandonar las teorias filozofikas ke el avia resivido en su epoka universitarya, fue su ovligo de partisipar personalmente a esta mizma gerra mundyal, la kuala metyo fin a una sivilizasyon bazada sovre los prinsipyos de un orden rasyonal.
Es durante este periodo ke Franz Rosenzweig empeso a eskrivir su selebre ovraje intitulado “La Estrea de la Redempsyon”, el kual es konsiderado (de parte de nombrozos savyos) komo una real kontribusyon a un muevo mistisizmo djudyo.
La Ensiklopedia Judaika mos ambeza djustamente ke durante esta mizma gerra, Rozenzweig ke se batyo en la armada Almana, mandava regolarmente a su madre sus refleksyones eskritas sovre chikas kartas postales, las kualas mas tadre devinyeron la baza mizma de su lavoro el mas importante, el kual tuvo un sukseso konsideravle en la esfera intelektual del payis i partikularmente en la djudia, tal los eskritores: Walter Benjamin, Gershom Scholem, Manuel Levinas, ansi ke mas tadre Stephan Mozes i Benny Levy, komo tambyen oy en dia en Fransya ‘Bernard Henri Levy’ i byen otros.
Sovre la kacha del livro se ve una Estrea kompuesta de dos triangulos, los kualos metidos el uno sovre el otro de manera kontrarya, forman una Estrea de la kuala la totalidad de puntas signifikan el djudaizmo en su valor la mas alta i mizmo la mas probante.
Las tres ekstremidades del primer triangulo son markadas de tres palavras ke son ‘Dyo’, ‘el mundo’, ‘el Ombre’ a las kualas responden las de las otras tres puntas del segundo triangulo ke son “kreasyon”, “revelasyon” i “redempsyon”.
Es djustamente en esta mizma epoka ke Franz Rosenzweig entendyo ke munchos de los konseptos ke el avia resivido durante sus estudyos avian konsideravlemente trokado. I esto fue la razon por la kuala, en djunto kon su livro entitolado “La Estrea de la Redempsyon”, el kijo publikar tambyen su thezis de doktorato sovre Hegel a la kuala adjunto una mueva konkluzyon larga de unas kuantas pajinas, afirmando ke el no adherava mas a las konsepsyones de entonses.
Munchos interpretos mos azen observar ke en la primera mitad del Venten siglo “kon Franz Rosenzweig i Martin Buber” espunto en la Evropa un djenero de “egzistensyalizmo djudyo”.
En efekto Rosenzweig manifesto komo un refuzo del rasyonalizmo de Hegel i bushko primordyalmente la sinyifikasyon de la vida en la egzistensya eya mizma.
Kontra Hegel ke afirmava ke ‘la Esensya preseda el Ser’ Rosenzweig kaji syempre insistyo ke es ‘el Ser (la egzistensya) ke preseda la Esensya’.
Malorozamente Franz Rosenzweig tuvo una fin muy larga i muy doloroza, lo ke no lo impedyo de kolavorar kon su amigo Martin Buber a una traduksyon en lingua almana de la Biblia Hebraika, i esto konformamente a sus propya interpretasyon . El tambyen (syempre kon Buber i Herman Cohen, ansi ke otros amigos) partisipo a la kreasyon en Almanya de un sentro de inisyasyon i estudyos djudaikos para adultos.
En desparte de esto, Franz Rosenzweig se batyo personalmente kontra dos otros sujetos :
El primer de grande importansa: “luchar kontra la asimilasyon de los djudyos a una otra ideolojia ”.
El segundo ke parese paradoksal i muy difisil a akseptar: “No adherar al Sionizmo” al kual el refuzava de reduzir el destino djudyo.
Personalmente, keridos lektores, no penso realmente ke ‘el fakto de adherar al Sionizmo’ reduze el Destino Djudyo. Munchas vezes, i mozotros semos kuryozos de konoser la razon de la perenidad de muestro puevlo, ombres i mujeres sin tyerra propya asta la kreasyon del Estado İsraelyano, migrantes ke durante 2000 anyos bivyeron en una perpetual instabilidad en payizes ajenos en los kualos eyos jeneralmente kedavan relativamente estranjeros, refraktaryos a kualkyer verdadera asimilasyon porke syempre persistia en eyos el dezeo de pizar un dia sovre tyerra de Israel .
El resumen de un paragrafo sovre Rosenzweig ke figura en el sityo Wikipedia, mos dize lo sigyente:
A la kestyon “Kualos son los faktores ke permeten al djudaizmo de kedar syempre bivo?” La ovra de Rosenzweig responde:
a) Su raporto a la Ley ke para el es mas importante ke la Historya.
b) Su raporto a la Tyerra ke (por un largo tyempo) kedo simplemente en la imajinasyon del puevlo djudyo.
c) Su raporto enfin a la Lingua ke tyene en eya una grande santedad.
