“ El puevlo djudyo es ahuera de la Historya de la humanidad. Uniko puevlo ke no es sometido al enkaminamyento del tyempo, el es el puevlo eternal” - Franz Rosenzweig
No savemos si lo ke dize Franz Rosenzweig es una realidad absoluta o byen, puede ser, un dezeo ke aspira a devenir una realidad.
En lo ke mos konserna, para la mas parte de los djudyos kontemporeanos mas o menos fideles a los preseptos fundamentales de muestra Ley todo en kedando avyertos a la evolusyon mundyal de mas a mas rapida i a sus ovligos imperativos sosyo kulturales: el Djudaismo es antes de todo bazado sovre el “Dekalogo” (los dyez komandamyentos komo se dizia en mi chikes), estos dyes doveres de esensya no solo relijyoza ma partikolarmente sosyal i mizmo interhumana.
En estas dyez Palavras ke Moshe Rabenu resivyo en el dezyerto i ke el transmetyo a los ke lo entornavan, no figura ningun byervo ke espesifika unikamente el djudaizmo; mizmo en el komandamyento ke konserna la sakralidad del Shabat, la Biblia mos dize ke “Shabat es un dia de meditasyon relijyoza ansi ke de absoluta inaksyon fizika, afin ke se repozen no solamente los ombres i mujeres ke lavoraron los 6 primeros dias de la semana, ma tambyen las varyas bestyas ke eyos posedavan i igualmente los esklavos o los ajenos ke se topavan en el espasyo adriento de sus paredes .
Todos savemos ke el Djudaizmo se distingue de las otras relijyones porke el mete vizivlemente en evidensya no solo el kulto en direksyon de Dyo ma tambyen el kudyo por los ‘humanos’ de ke orijen ke sean, unikas kriansas kapavles de rekonoser espiritualmente la grandor de Adonai.
Esto dicho, revineremos a la kestyon ke el titolo de este artikolo desperta en muestro esprito: “Ken es en realidad Franz Rosenzweig”? Se puede responder: Una de las mas interesantes figuras del Djudaizmo de Almanya en su bushkida de una kreensya ke sera una manera de pensar bazada no solo sovre prinsipyos i valores ke mos son familyares, ma tambyen sovre un potensyal de sensivilidad propya a kada persona.
Filozofo i teologo djudyo alman, el bivyo durante kaji las dos ultimas desenias del 19en siglo i poko mas del primer kuarto del Venten siglo (25/12/1886- 19/12/1929).
El nasyo en una famiya ke era sosyalmente muy byen konsiderada, bastante prospera ekonomikamente i partikularmente asimilada a la kultura del payis; su padre era un grande industrial i su madre una persona de alta kultura literarya i artistika.
De esta manera, el se engrandesyo en una atmosfera mas o menos liberal, adekuada a los uzos i kostumbres de sus jenitores, para los kualos (todo en refuzando kualkyer konversyon al Kristyanizmo) la observansya del djudaizmo se limitava simplemente a selebrar los grandes Muadim: “Roshashana”, “ Kipur”, “Pessah” i tambyen a fyestar la Bar Mitva de los ijos.
Franz Rosenzweig izo altos estudyos universitaryos de Medikeria, Historya i Filozofia . Su thezis de Doktorato tenia komo sujeto -Hegel i el Estado-.
El historyano Eric Weil mos dize a este sujeto:‘La kestyon formulada en la thezis de Rosenzweig es de saver si el Estado Universal Hegelyano es adekuado a la realidad del Estado-Potensya’ (La question qui traverse la thèse de Rosenzweig est celle de savoir si l’État Universel Hégélien est adéquat à la réalité de l’État-puissance).
A esta epoka , en una partida del Kontinente Evropeo, era el empesijo de un djenero de Panjermanizmo, durante el kual munchas personas de su entorno, amigos o paryentes leshanos se avian konvertido al Kristyanizmo.
Es ansi ke a un syerto momento de dubyo, poko konvensido del rasyonalizmo Hegelyano, Franz Rosenzweig tambyen kijo konvertirse a la relijyon katolika, ma no en kualidad de pagano si no de djudyo, lo ke lo pusho a kerer pasar en una Sinagoga ‘el ultimo dia de Kipur’ ke presedava su konversyon .
Ke se paso en su esprito durante este Dia Santo, en la atmosfera empapada de sakralidad de la Keila ke el avia eskojido? Ke orasyon lo esmovyo asta sentir subitamente en lo mas profundo de el mizmo, su apartenensya irreduktivle al Djudaizmo ? Ke akontesyo en el, en la espiritualidad de estas horas de profunda meditasyon ande (kreente o no kreente) kada uno se syente inevitavlemente bivir en un espasyo de Verdad?
Es ke fueron las orasyones dichas todos endjuntos, munchas vezes el Taled sovre la kavesa o sovre los ombros? O puede ser el “ Kol Nidre” o el sonido del Shofar de la tadre? En todo kavzo, fue lo ke fue, a la fin del ofisyo relijyozo Franz Rosenzweig se sintyo irreversivlemente djudyo por syempre.
A kontinuar la semana venidera,
por mankansa de lugar en esta pajina
