Si… de muevo la barbaria, la muerte i el dolyo en Ankara, kapitala de un payis ke parvino a no partisipar a la horrivle segunda gerra mundyal i ke ansi pudo salvar su payis de la destruksyon i su puevlo de la sufriensa.
İ en este momento, aproksimativamente 76 anyos despues la salvajeria de la gerra en kestyon, es un terrorizmo salvaje ke desde un largo tyempo se abatyo sovre muestro payis.
Ansi, por la tresera vez en el espasyo de 5 mezes, alhad la tadre un muevo golpe kriminal fue perpetrado ke desho detras de el: “35 muertos por la mas parte jovenes kaji todos estudyantes de universita i aproksimativamente 125 feridos entre los kualos 71 tuvyeron la nesesidad de ser hospitalizados, los dyez en estado muy grave mos disheron los buletines elektronikos i la prensa eskrita de Lunes demanyana.
En realidad la kuantidad de los muertos es de 37 personas entre las kualas las dos son los terroristos eyos mizmos. Ma no azeremos de eyos un simple shifro entre otros , ’35 viktimas ke son kriansas de Dyo i ke pyedreron sin ninguna razon el derecho de egzistir, 35 humanos inosentes en totalidad, los kualos se topavan provablemente aya por hazardo sin ningun proyekto negativo en tino, para enkontrar un kerido o por simplemente pasar tadre de alhad una o dos horas agradavles entre amigos. 35 famiyas ke se syenten subitamente undidas en la amargura, padres i madres ke pyedreron por syempre el entusyazmo de bivir.
Despues de la salvaje desgrasya del segundo konflikto mundyal del anyo 1939, entre 1955 – 1975 paresia aver espuntado en el korason de munchos individuos, un ‘sentimyento de respekto de la vida del otro ke si mizmo’ komo un dezeo intenso i mizmo envezes imperyozo de azer dezapareser por syempre la horror de las trasas sanglantes de los anyos pasados, un sentimyento ke enfin djustifikara el maraviyozo orgolyo de los humanos de ser kriansas pensantes avyertas a kuakyer otros humanos.
Por seguro ke en este kurto lapso de tyempo, no solo en otros lugares leshanos del mundo ma tambyen serka de mozotros, uvo muy dezagradavles i envezes relativamente largos konfliktos entre potensyas serkanas, los kualos aun bastante desplazyentes tomaron fin grasyas a una fuerte voluntad de las dos partes de parvenir a una solusyon ke les permetera de no kayer en la salvajeria de una verdadera lucha sanglante.
Ma desde unos kuantos anyos, de muevo empesaron en varyos lugares ke mos son leshanos o mizmo munchas vezes muy serkanos, no solo konfliktos a la sigida de un kualkyer litijyo, ma imprevizivlemente atakes salvajes intensyonalmente mortales, al pareser sin motivasyon real, en el solo eskopo de parte de los matadores de afirmar sus prezensya.
Aktualmente la inkontestavle evolusyon de la Syensya i de la Industria permete paradoksalmente en mizmo tyempo la deskuvyerta de remedyos ekstraordinaryos para salvar la vida de munchas personas infirmas ma tambyen permete malorozamente de mezmo la fabrikasyon de armas de mas a mas sofistikadas, aksesivles a kada uno kontra un suma de moneda anchamente apropyada.
El grande biologo Jean Rostand autor de nombrozos lavoros sovre ‘la parthenogenese eksperimentale’ tyene dicho verso la fin de su vida: “La syensya izo de mozotros “dyos” antes mizmo de tener la valor de ser ombres” (science has made us gods even before we are worthy of being men.)
Si… desgrasyadamente la produksyon de muevas armas de mas a mas sofistikadas ke permeten a fabrikantes multi milyarderos de enrikesersen ainda mas, permeten tambyen a matadores por la mas parte inkultos i inhumanos de kontentar de mas a mas sus instinktos asasinos.
