Munchas grasias, LASZLO NEMES, el grande sineasto, por no deshar olvidar la desgrasia del HOLOKOSTO. Kon su realizasion inkredivle pudimos apresiar el filmo Ungaro...
Seleksionado komo una ovra maestra del 7en Arte, a la fin del filmo, difisilmente mos alevantimos del fotolyo del sinema.
Tres dammas delantre de mosos estuvieron komentando el filmo, avansandosen a la salida. Oyi esta konversasion entre estas amigas:
“Ke egzajerasion de karnaje, no pensas Fatma?”
“Te estas yerrando” le respondio la una de entre eyas, “Yo meldi muncho sovre este sujeto – kreyeme, la realita ke se bivio por los Judios estuvo mas kruel de lo ke fue amostrado oy…”
Orozamente ke ay tambien personas ke pensan i son konvensidas de la realita del Holokosto. Kijo dizir ke empeso el mundo a no inyegar!
Pasaron MUNCHOS anyos, ma el senaristo Ungaro supo vizualizar el senario de la istoria maldicha ke se bivio en la Segunda Gerra.
THE SON OF SAUL mos konta las viktimas de los kampos de konsentrasion, kon el djugo perfekto de figuras estompadas, detalyos perfektos. Se asperava un premio de los 88. Premios de la Akademia por este filmo, por ke era su derecho bien meresido. Si peryi mi esfuenyo ayer la noche para pueder mirar la nochada de la seremonia de los Oscares, ya valio la pena...
Saul. despues de asistir a la manera de dar la muerte a un ijiko de 10 anyos por un doktor nazi, desida de fuyir el kadavre del joven, ke no era su ijo, para ke no lo despedasen. El keria kumplir los d’alkavos deveres ke se deven de azer a un Judio despues de su muerte.
No se espanta de riskar su vida, por kerer topar un rabino por un kadish i enterrarlo.
Saul, del empesijo fina la fin del filmo, kon pasensia, bushka a realizar su projekto, mizmo ke unos de las viktimas ke lo konosiyan de antes, le dizen: “No es ni tu ijo, tu no tuvites kreaturas, Si te aferran i si se sospechan de tu idea fiksa, mozos todos vamos a entrar a las kamaretas de la muerte, aser ke, por las oras, estamos kargados de la limpieza del kampo... Ma estamos penando para ganar tiempo de bivir i por el momento estamos en vida.”
Malgrado ke es sin kerer, sus amigos ayudan Saul i no lo deshan solo para realizer lo ke pensava.
Sin kontarr la fin del filmo, apresyimos los 5830 miembos de la Academia ke intrego el Oscar del mijor filmo estranjero a:
THE OSCAR GOES TO: SON OF SAUL
