Naturalmente muestro sujeto de oy es las ijas, las mujeres i sus derechos. Aktualmente, la mueva jenerasyon no keren solo ser espozas, ma tambyen tener kriaturas i karyera.ras i karyera. Puede ser ke es el dezeo de “independensya ekonomika...” Pensan: “Si esto ganando i reushendo a alkansar a mis menesteres, porke no profitar?” Naturalmente, ay i otros faktores, ke de una manera, estan “ovligando” la mujer a lavorar. Se puede dezir ke, mas muncho de ovligasyon, es un “menester” materyal. Oy, marido i mujer estan lavorando para luchar mano kon mano, la vida azyendose mas difisil de diya en diya. Espesyalmente, kuando ay kriaturas, los gastes munchas vezes estan depasando el budjeto de una famiya mediana.
Devemos konsiderar i aspektos diferentes de la kestyon. Por egzempyo, la ija ke izo altos estudyos, ke ya lavora de antes de kazar o ke ya alkanso a una pozisyon relativamente alta en su karyera. Eya tambyen se topa enfrente de un dilemno, kuando se kazan… “KARYERA O KRIATURA?…”
Siguro, ser madre es un sentimyento inkomparavle. Ma komo dishimos, se trata de una mujer en alta pozisyon o a lo menos, en buen estatuto. Munchas, al koste de atrazar la felisidad de ser madre, dan la prioridad a la karyera. Estas, de un punto de vista, tyenen el lukso de permetersen a eskojer esta alternativa. Preferan dar sus enerjia i sus tyempo al lavoro, sin tener otros penseryos. Porke, para eyas, tener ijos, es importante. Los chikos tyenen menester de sus madres en vezes “full time!” Esto es un punto de vista ke respekto.
El dilemna empesa en jeneral, kon el nasimyento del bebe. Ay mujeres, kaji en la mizma pozisyon de las de arriva. Eyas preferan dar un entervalo de unos kuantos anyos. Seya ke estan siguras de topar echo mas despues o seya por otras razones. Mizmo si no es personalmente, yo koanosi kavzos semejantes en mi derredor. Ke pueden ser las otras razones?…El ombre puede tener buena situasyon, sufizyente para alkansar a todos los menesteres. En esta kategoriya, sin problemas ekonomikos, la mueva madre se kere okupar personalmente de su bebe fin a una syerta edad. Pensa tornar mas tadre a su echo. En realidad, es un estado muy pozitivo del punto de vista de la kriatura, ke se engrandese, sintyendo la kalor i la serkor de su madre.
Ke puedemos dizir de las madres, ke a todo presyo dezean kontinuar a lavorar?. Bueno, si tyenen los remedyos, preferan angajar una buena miradera, o komo se dize: una dada. Ma, ay i las madres ke son ovligadas de kontinuar a lavorar, djustamente, por menester materyal. No tyenen el lukso de dar un entervalo, porke ay el riziko de no topar despues, un buen empyego. Komo no keren tomar este riziko i eyas, angajan una ayudante (en jeneral por el diya), al koste de pagar la mitad de sus mezadas…
Mi opinyon es, ke si ay remedyos ekonomikos, es preferavle de kedar en kaza, i okuparse de las kriaturas a lo menos, por un syerto tyempo. Munchos van a pensar ke kedi muy demode. Ma, no me importa!, Syempre tuve el uzo de dizir libramente mis ideas. Portanto, ay un punto ke esto enteramente de akordo: lavorar es uno de los derechos de la mujer. Aktualmente, i los maridos se estan aserkando kon mas entendimyento al lavorar de sus espozas. Lo estan achetando komo un derecho de la mujer. Ay diversas solusyones, apropyadas a kada kavzo. Los djenitores, naturalmente, kon sezudeza, kon maturidad, van a reushir a toparlas.
P.S. Aserkandomos del 8 Marso, eskoji esta tema, ande se trata tambyen, del derecho de lavorar de la mujer. Komo se save, 8 Marso, es el Diya Universal De Los Derechos de La Mujer.
