La Bruyere disho: “Los ke se keshan de la kurteza del tyempo, son los ke no lo emplean komo se deve”… Ampesimos oy kon una refleksyon. Ganar un poko de tyempo!...Es lo ke dezeamos la mayoriya de las personas. Komo se puede alkansar a este buto? Naturalmente, en empleando kon ekonomia las oras i afilu los puntos. En una manera, ser eskasos kuando se trata de muestro tyempo, syendo ke no egziste dingun remedyo de alargarlo. No puedemos tambyen, traer atras los diyas i las oras ke pasaron…
Sintimos muy frekuente, munchos kesharsen ke las oras no les estan abastando, ke estan unas, ensima de otras. Se keshan de la kurteza del tyempo, aunke se alevantan temprano i se echan tadre. Ay otros kon este djenero de keshas: “Mis ovligasyones estan pujando i tambyen, mis responsabilidades. Mi famiya se esta keshando de no verme i esta dizyendo ke eramos mas orozos antes”.Estas personas adjustan ke no tyenen tyempo afilu de repozarsen o de azer unos kuantos diyas de vakansas. Yo lo ke puedo es responder kon esta refleksyon de Ernest Hello: “Lavorar es muy simple ma, repozarse? Ayi esta la difikultad!”
Komo se puede topar tyempo sufizyente para todo? Siguro, ke no es tan simple ni muy fasil. En un diya normal, topar tyempo para kada koza, en dando la prioridad a lo mas importante, es dunke una kestyon de organizasyon. La persona dezorganizada pyedre tyempo en baldes, no reushe a azer todo, i esto la rende nyervoza. A la kontra, kon un poko de organizasyon, kon kalmo, se gana tyempo, se produize mas demaziya. I esto, sin ser ovligados de alevantarsen demanyana a medyo durmyendo! o la noche echarsen muy tadre, muertos por durmir i kansados. Es reelmente importante de tomar el esfuenyo menesterozo. Esto puede ser la garansiya de empesar el diya sigiente, kon buena umor i byen repozado.
Es provechozo de konoser las okupasyones prinsipalas, el program del diya i meterlas en un orden, si posivle. Aki, una dicha sinyifikante de Anatole France: “La egzistensya umana es kurta. El ombre es maestro de su tyempo, solamente kuando lo diviza en oras, en minutos i segondos. Kijo dezir, en parselas proporsyonadas kon la kurtor de la vida”.
Dunke, estamos avlando de organizasyon i en una mezura, de dishiplina, ke kon tyempo, se puede transformar en uzansa. Por egzempyo, si tenesh ovligasyones a oras fiksas, es preferavle aparejar de una noche antes, lo menesterozo. Es tambyen, una buena idea, de notar las ovligasyones kestyones o okupasyones primordyalas. No se deve pensar ke semos kapavles de realizar mas demaziya del “maksimum”. I en prinsipyo, es importante de no depasar el limito de muestras fuersas fizikas i kapachita mental.
La persona ke acheto esta dishiplina, kualas ke seyan sus okupasyones o su estado fiziko, ya echo un grande paso en el kamino de la reushita. Meteremos aki el punto final en ekspresando mis regretos . Oy lunes 8 Febrero esto mandando este teksto por no deshar vaziya mi kolona. Esto reelmente regretando de no aver asistido ayer a la selebrasyon del treser DİYA İNTERNASYONAL del LADİNO, a kavza de un chiko aksidente. Sueto mas munchos anyos de kontinuasyon a fyestar este Diya. Komo dishe en mi titolo, syempre no reushemos a realizar muestros planos. Sanedad ke ayga…
