La selebrasion de Tu Bishvat en la Sinagoga Hemdat İsrael de Kadiköy

Dora NİYEGO Judeo-Espanyol
27 Ocak 2016 Çarşamba

Diya de Alhad, el 24 de Enero, la fiesta Tu-Bishvat se selebro en la Sinagoga Hemdat İsrael de Kadiköy kon la partisipasion del Grande Rabino, Rav İsak Haleva. Los dirijentes de las komunidades, los prezidentes de las enstitusiones i asosiasiones, i munchos miembros de muestra komunidad asistieron a la selebrasion.

La selebrasion empeso kon el deskorso del Prezidente de la Administrasion de las Sinagogas de Kadikoy, Eli Arditi:’Komo el arvole da alimento al entorno, la nasion judia deve de dar luz al enterno. Kreser un arvole no es fasil, por esto kale muncho tiempo i kale dar muncho esfuerso. De mezmo, engrandeser i edukar una kreatura no es fasil, kale ke des muncho esfuerso sin enfasiarte’.

El koro de la Maestra Miniks de Suadiye kantaron kantikas sovre la fiesta.

Los mansevos Mayk Modiano, Semih Levi, Aviel Kohen, i Beri Behar meldaron mezmures del Teillim (Şir Amalot).

Mando Alfasa avlo en el nombre de Berta Banana, la Prezidente del Talmud Tora de   

la Sinagoga Bet-El de Caddebostan:’Adam i Eva fueron ekspulsados de la Guerta de Eden. Por esta razon, la persona kale ke pene muncho para alkansar a la santidad (kutsiyet) i a la buenda. La Tora kompara el arvole kon la persona. Komo el arvole tiene menester de la luz del sol, la persona tambien para mejorar tiene menester de la enerjia de las mitsvas.El Sinyor Dio konfio la Tora a las kreaturas, i mozotros, los madrihes de Talmud Tora estomos penando para kitar en medio el potansiel de las kreaturas i ke den frutas’.

El Gabay de la Sinagoga Sedat Amon disho ke esta fiesta fue selebrada en esta Sinagoga por setenta isinko anyos i rogamos ke seyga selebrada por munchos anyos otros. Amon remersio a todos los dirijentes de la fondasion de las Sinagogas de Kadiköy por sus esfuersos por mejorar la komunidad’.

El koro de los yahides de la Administrasion de las Sinagogas de Kadikoy kantaron kuatro kantikas.

El Haham Akaal Rav Yeuda Adoni mos ekspliko la sinyifikasion de Tu-Bishvat en su deskorso:’Tu Bishvat empeso a selebrarse en esta Sinagoga antes sesenta i sinko anyos antes. Esta noche, duspues ke dizimos la Beraha de kada fruta, mo la komemos. Muestra Tora dio muncha emportansa al arvole, i mos ordono de ensembrar munchos arvoles i de no kortar dingun arvole. Komo el arvole tiene menester de esfuerso para kreser bueno, las kreaturas tambien tienen menester de muestros esfuersos para ser buen edukados’.

Los mansevos de Talmud Tora, Keren Shermesh mos mos alegraron en kantando kantikas.

El Grande Rabino Rav İsak Haleva mos avlo sovre la sinyifikasion de Tu-Bishvat:’Esto remersiando al Dio porke mos dio esta ermoza tradision, i mozotros la estomos selebrando en esta ermoza Sinagoga kada anyo. Kada fiesta mos amostra komo la persona es atada a la natura. En el judaizmo, kada fiesta tiene una koneksion kon la natura. Pesah se selebra en la primavera, Shavuot kuando los botones (tomurcuk) empesan a avrir rozas, Sukot signifika el tiempo ke se arekoje lo ke se ensembro. Ansi, amostramos al Dio, komo estomos apresiando lo ke se pasa en la natura. Mezmo ke estas sezones no se bive en el mundo entero, los judios las selebran en el mezmo tiempo en el mundo entero’.

Ala fin de la selebrasion, se avio el Ehal Akodesh, i todos los asistientes disheron endjuntos la orasion Anoten, kon grande emosion.

En saliendo de la Sinagoga, todos endjuntos se dirijaron a la guerta para ensembrar un arvole, komo se aze kada anyo.

Rogaremos al Dio, ke mos de repozo, para pueder selebrar todas las fiestas, kon grande alegriya.