La semana ultima asistimos a una aktivitad del pianisto konosido David Ezra OKONŞAR en una organizasyon de muestra komunitad. El, kon sus dedos de seda mos izo oyer el onzen sonat de Mozart; de kon una enterpretasyon (yorum) diferente en un ritmo ‘Mehteran’.
La influensa de los Ottomanos i el ritmo de la muzika ‘Mehter’; desho munchas trasas en los sieklos 17-19 en la muzika de la Evropa.
Entonses; en el egzempyo de la Opera ‘Saraydan Kız kaçırma /Fuyir la mucacha del palasyo’ de Mozart, estamos vyendo esta influensa.
Robert Schild el organizator de esta nochada inolvidavle; kon sus enterpretasyones kontinuo la konversasyon kon Okonşar ke; termino su resital kon los ‘Hebraic Rhapsodies’ ke es una ovra de arte enteresante ande la partida de Hanukkah se aplodiso en pyes por todos los partisipantes.
Fue una nochada muy reushida, ma malorosamente kon poka djente. Pekado a los ke no puidyeron asistir; los ke profitaron fue los ke partisiparon.
Enfin; ya se save ke los myembros de muestra komunitad dan difisilamente apoyo (destek) a ovras de arte; komo resitales, konsertos, teatros i otras aktivitades.
Aplodisar (alkışlamak) i dar valor al merito del den frente egziste en poka djente. El karakter de syertas personas no dan a mano de felisitar el den frente por la ovra ke kreo (yaratmak).
Kritikar solamente sin meter mano, sin enteresar a los problemes, es muy fasil.
Enfin esta noche vamos a kemar las kandelas de Hanukkah ke mos van a allumbrar la vida.
Hanuka es la fyesta de los Makabeos, fyesta sinyifikativa; porke mos aklaro sovre la gerra de los djudyos kontra los Siryanos.
Los djudyos eran un grupo de sivdadinos muy chiko en akel tyempo. Keriyan bivir kon sus tradisyones, sus maneras de vida, mizmo ke estavan menazados.
Sus mantenimyentos era la agrikultura, eran modestos, se kontentavan kon poko.
Al lado del reynado Siryano eran proves.
Antes ventidos syeklos, los siryanos aviyan okupado İsrael i estavan penando a propajar la relijyon i las tradisyones gregas antiguas en esforsandosen de influensar los djudyos.
Munchos de los djudyos empesaron a imitar los gregos antiguos, vistyendosen komo eyos, tomando nombres gregos i otros kostumbres.
El Kohen agadol ‘Matatia Ben Yohanan’ i los sinko ijos ke moravan en Modiin, i aparteniyan a la famiya de ‘Hashmonayim’; se opozaron a esta situasyon, i tomaron desizyon de gerrear para pueder kedar djudyos. Despues de tres anyos de gerra, los Makabeos ganaron i el Templo sakro ke se estava utilizando fin akel dia para las tradisyones de los gregos antiguos, paso a la mano de los djudyos.
Por akodrarmos de este evenemento se selebra la fyesta de Hanuka.
Hanuka sinyifika avyertura. Porke el Templo se aviya avrido de muevo en akel tyempo.
Hanuka es la fyesta de alegriya i de luz. En esta fyesta kemamos los mueve kandelares.
Los Makabeos aviyan topado un bokal de azete kasher, sin tokar kuando entraron al Templo. Esta azete puediya kemar solo un dia, ma akontesyo un miraklo i la azete kontinuo a kemar ocho dias.
Yeuda ke era el ijo grande del haham Matatia, era el komandante de la armada. Le aviyan metido el nombre de ‘MAKABİ’ ke sinyifikava martiyo en ebreo.
La selebrasyon de la fyesta kontinua ocho dias.
Hanuka simboliza; la Luz de la Libertad, de la İntelijensya, del Entendimyento, de la Djustisya i de la Razon.
El dover de una madre djudia es; de aparejar la Hanukiya kon las kandelas kadal dia, i kuando el ombre de kaza kon los ijos i ijas vyenen se aze la orasyon, se kanta todos endjuntos las kantikas i se kome burmuelos i dulsuryas.
El senso de las kandelas de la Hanukiya es: La primera kandela es el simbolo del Dyo todo el Puederoso ke disho: ‘Ke la Luz Seyga’,
La sigunda kandela es el simbolo de la ‘Tora’,
La tresera kandela es el simbolo de ‘La Djustisya’,
La kuatrena es el simbolo de ‘La Piadad’,
La sinkena es el simbolo de ‘La Santedad’ (kutsallık),
La sejena es el simbolo de ‘La Kerensya’,
La syetena es el simbolo de ‘La Pasensya’ i la ochena es el simbolo del ‘Koraje’.
Vos oguro una fyesta alegre; kon unyon i todos endjuntos, un avenir klaro; i ke la luz de la Hanukiya ke aklare muestros korasones, i kemos trayga la pas en el mundo entero.
Hag Sameah.
