Entornado de amor i de profunda kerensya de parte de su mujer i de sus serkanos, ansi ke de un inmenso respekto empapado de gratitud de parte de su puevlo.
Yitzhak Navon
sinken Prezidente del Estado Hebreo sero por syempre sus ojos a un payis ke el syempre sirvyo kon fervor i kon una fuerte voluntad de adelantamyento, progreso i unyon.
Segun el rezultado de una chika bushkida ke ize a su sujeto: El nasyo en Yerushalayim en 1921, ijo de un padre sefarad i de una madre orijinarya de Maroko. İ kaji desde la kreasyon del Estado İsraelyano, el okupo varyos postos en el espasyo governomental, mandado en kualidad de diplomato en Uruguay i en Arjentina, i mas tadre kargado de diferentes funksyones antes el anyo 1978, data a la kuala el fue elijido Prezidente del Estado İsraelyano.
El fue el primer prezidente de İsrael ke peno a anchear las limites de su prestijyoza funksyon en transmetyendo publikamente sus analizes personales konsernando varyas kestyones de grande lmportansa, i esto afin de salir de la aktividad unikamente reprezentativa ke era su muy honoravle posto
El tambyen se esforso de diminuir las diferensyas sosyales ke se topavan entre los myembros del puevlo i a azer aserkar las relasyones laiko-relijyozas entre “Ashkenazim”i “Sefaradim”.
De mezmo, el fue el primer a formular la idea de un pakto establesyendo los raportos İsraelo-arabos.
El se esforso a ser no solo un ombre politiko para su payis, ma un Ombre de Estado ke savia mirar leshos delantre de el, todo en kedando fidel al rekordo del triste pasado de su puevlo ke bivyo dos mil anyos sovre tyerras ajenas.
Munchos de los lektores se akodraran ke en los primeros anyos despues su kreasyon, uvo un tyempo en İsrael ande kada uno avlava espontaneamente la lingua del payis de ande vinia, lo ke era un impedimyento seryozo para una homojeneidad kompleta del puevlo, lo ke avia ovligado el governador de estonses a ordenar “Haverim medaber İvrit”!
Los anyos pasaron i la kohezyon dezeada se afirmo por syempre en el payis. Portanto mas tadre espunto esta vez en el puevlo, el dezeo de no deshar murir en el olvido las raizes de sus varyas orijenes, ‘el Yiddish para los ashkenazim’,’el Djudeo-Espanyol/ Ladino para los sefaradim’, ‘el Haketia para los ke venian del Norte de la Afrika’, avlas de muestros ansestros yenas de reşeksyones i de sehel aun sus vokabularyo mas o menos şako.
De su parte, syendo de una ancha kultura literarya, Yitzhak Navon, despues de aver kumplido su dover de Prezidente, sintyo el menester de lavorar en favor de su lingua etnika, i grasyas a sus esforsos fue kreada la “Institusyon İsraelyana para la Promosyon del Sefaradizmo i de su lingua yamada simultaneamente “ladino” i “djudeo-Espanyol”.
Grasyas de mezmo a la grande kontribusyon de muestro ansyano kompatrioto orijinaryo de İzmir “Moshe Shaul” i de su presyoza ekipa kompuesta de valorozos eskritores, poetas i gazeteros, esta mizma İnstitusyon aze el ermozo lavoro de edisyon de la revista “Aki Yerushalayim” i de bushkidas de vyejas ovras eskritas en muestra lingua ansestral: poemas, romansas, kantikas, provyerbos i dichas, komo tambyen muevas revistas igualmente totalmente eskritas en la lingua de muestros padres, tal el mensual “El Amaneser”.
Debasho la inspirasyon de Yitzhak Navon, un enorme esforso fue i es syempre echo para ke nada muera en el djudaizmo.
Ke su alma repoze en paz!
Todas muestras kondolensas a su famiya, sus keridos ansi ke al puevlo İzraelyano i al Sefaradizmo.
