Segun lo ke mos ambezan varyos diaryos: En el korso de uno de sus resyentes diskorsos, Binyamin Netanyahu signifiko ke”al empesijo de la maldicha segunda gerra mundyal, antes el anyo 1941, Adolf Hitler no tenia realmente la intisyon de eksterminar los djudyos, ma simplemente de arrondjarlos ahuera de Evropa i ke fue debasho la influensa i las sugjestyones del eksesivamente anti-Djudaiko Mufti de Yerushalayim “Haj Amin al-Husseini” ke el Fuhrer penso realmente erradikar totalmente muestros korelijyonaryos de la superfisia de las tyerras del kontinente en mandandolos a los kampos de konsentrasyon para azerlos murir de una manera salvaje.
Estas palavras del prezidente aktual del Likud provokaron la irra (fuerte ravya) de una grande parte de la aktual klasa politika İsraelyana (partikolarmente de Herzog prezidente del partido Sionisto İsraelyano) i de nombrozos historyanos ekspertos en el sujeto, los kualos afirmaron ke las palavras del Primer Ministro İsraelyano son “una total kontra verdad historika”.
A este propozito se meldo en la gazeta Haaretz ke desde el anyo 1940 Hitler ya avia pensado organizar los primeros masakres de Djudyos en Polonya; el avia formado grupos de intervensyon de SS kargados de eliminar la populasyon djudia, lo ke okazyono durante la anyada 1941 la muerte de a lo menos 300.000 de muestros ermanos ke fueron egzekutidos de parte de estas unidades.
De mezmo, Dina Porat, shefe historyana del Memoryal “Yad Vashem” en Yerushalayim, estima ke las palavras de Netanyahu no son historikamente egzaktas. Eya deklaro: ‘Mizmo si el tenia pozisyones anti-Djudaikas ekstremas, no es el Mufti “Haj Amin al-Husseini” ke dyo la idea de eksterminar los Djudyos. Esta idea de Hitler era anteryor a su enkontro kon el Relijyozo Muzulmano en el mez de Novembre 1941.
De su parte, a la kestyon konsernando las palavras del primer Ministro İsraelyano, Serge Karlsfeld (historyano i despues la gerra, persegidor de los asasinos Nazis) respondyo ke las deklarasyones de Netanyahu son totalmente inegzaktas i ekstremamente regretavles, eyas paresen kaji minimizar el rolo de Hitler i echar la responsavilidad de ‘la solusyon final’ sovre los Arabos.
Serge Karlsfeld afirmo tambyen ke en su diskorso del 30/1/ 1939 Hitler ya avia avlado de la eliminasyon de la rasa djudia en Evropa, lo ke prova ke la dicha ‘solusyon final’ ya estava en kamino desde nombrozos anyos en Almanya, Bielorusia i Ukranya.
No mos olvidaremos ke ‘el masakro de Babi Yar’ avia sido echo dos mezes antes del enkontro de Hitler kon el Mufti Mohammed Amin al-Husseini el 28 Novembre 1941.
No, (repeto Karlsfeld) el Fuhrer no aspero al Mufti de Yerushalayim para kumplir su terrivle lavoro de erradikasyon de los djudyos; ma esto dicho, kale en todo kavzo notar ke es verdad ke el Mufti Mohammed Amin Al-Husseini se opozo kategorikamente durante la gerra a una migrasyon de los djudyos de Evropa en Palestina.
A su torno, el Sentro Simon Wiesenthal todo en deklarando ke las palavras kritikas de Benyamin Netanyahu konsernando el Mufti son absolutamente egzaktas i ke en efekto el grande dinyitaryo palestinyano fue uno de los peores antisemites del venten siglo i el instigador de los primeros pogromes anti djudyos en la Palestina, ma no el instigador de la Solusyon final en la Evropa.
İ enfin, segun “Reuters”, Steffen Seiber (porta-boz de Angela Merkel) deklaro ke la Almanya eya mizma reafirma kel holokosto no fue provokado por las insitasyones del grande Mufti de Yerushalayim i ke el pezgo de esta responsabilidad repoza sovre su puevlo.
“Todos los almanes konosen la historya de la lokura asasina de los Nazis ke fue el Holokosto. Esto se ensenya en las eskolas afin ke nunka sea olvidado.
Todos los Almanes savemos ke “la responsabilidad de este krimen kontra la humanidad” es realmente la muestra…. es Almana”
