El 4 del mez de novembre, “una grande parte de la populasyon İsraelyana i tambyen la mayoria de la diaspora djudia dispersada en la Evropa komo en los Estados Unidos” se akodraran kon amargura el dia preto ande Vente anyos antes, el 4 Novembre 1995, poko dospues ke el ‘premyo Nobel’ le fue atribuido ansi ke a Shimon Peres i Arafat a la okazyon del sukseso del Akordo de Oslo, la prensa mundyal anunsyo la muerte de Yitzhak Rabin asasinado de la mano mizma de uno de sus propyos korelijyonaryos.
Personalmente no me akodro aver imajinado antes de este terrivle evenemento ke un semejante krimen puedia ser perpetrado de parte de un djudyo kontra un otro djudyo. El fakto me paresyo al empesijo komo una farsa inyovle; imposivle de pueder akseptar ke el prezidente de İsrael fue matado por uno de sus propyos sujetos.
En desparte ke los djudyos bivyeron durante siglos i siglos en payizes ajenos syempre kudyozos los unos de los otros, el “Dekalogo” ke es el kodigo moral el mas fuerte de sus relijyon les interdize absolutamente de perpetrar aktos kriminales. “No mataras” mos ordona uno de los Dyes Komandamyentos.
En sus estado de kontinual lnstabilidad, rondjados por los unos i mal resividos por los otros “Dar la muerte” fue un akto kaji deskonosido de muestros avuelos, mizmo kuando en el pasado leshano, eyos se sintian persegidos.
Por seguro ke munchos de los lektores se akodraran las palavras ke Golda Mayer pronunsyo durante su mandato: ‘Puedo todo perdonar a muestros enemigos ma nunka de aver ovligado muestros jovenes a matar’.
İ, triste ironia del hazardo, su propyo suksesor resivyo la muerte no de parte del enemigo ma de la mano mizma de un djudyo, estudyante universitaryo en Syensya Juridika.
Krimen de ermano a ermano, Yitzhak Rabin fue asasinado por un desendyente de Moshe Rabenu, krimen perpetrado kontra el Ombre ke avia parvinido a salvar muestros korelijyonaryos viktimas de lo ke fue ‘el kavzo del aeroplan desviado en direksyon de Entebbe de parte de djihadistos palestinyanos’.
El fue un shefe de payis kompleto, amorozo de su tyerra i de su puevlo, simultaneamente ombre de refleksyon i ombre de aksyon. Aun ke su karyera militarya no fue muy larga, eya fue muy aktiva, ‘el’ se batyo kon fervor kontra las armadas enemigas kuando sintyo ke su payis estava en perikolo.
A notar tambyen ke “la gerra de sesh dias” no fue una gerra de atake de parte del Estado Hebreo ma de akavido a la sigida del ‘blokus de parte del Ayifto del kanal de Tiran a las naves Israelyanas’.
Yitzhak Rabin no se kontento de ser un militaryo el kijo ser tambyen un ombre politiko. En 1968 el fue dezinyado “embashador İsraelyano en los Estados Unidos”, en 1973 akseptado en la Kneset komo deputado del partido travayisto ansi ke ministro de Lavoro i enfin en 1974 suksesor de Golda Mayer en kualidad de Shefe del Governo İsraelyano dezeozo de ayegar a un estado de paz kon sus vezinos los mas serkanos.
Kualo realmente aze la grandor i asegura la perenidad del djudaizmo? ”la obedyensya syega a syertos pasukim ke reklaman el retorno de una tyerra ke mos apartenia antes milenaryos? O, la bushkida (sea mizma sin rezultado immedyato) de la paz jeneradora de vida i progreso?
Por vuestra informasyon, ay de esto unos kuantos dias meldi en el sityo elektroniko The Times of İsrael: ke “el 4 Novembre sera projektado por la primera vez un dokumentaryo intitulado ‘Rabin:de ses propres mots’ /(Rabin:de sus propyas palavras), dokumentaryo ande se topara enrejistrada una entrevista ke no fue nunka publikada asta agora, ande Yitzhak Rabin sinkyen primer Ministro del Estado İsraelyano deklaro klaramente ke: “El movimyento de implantasyones ke venia de empesar en akeya epoka era komparavle a un ‘kanser’ ke puedra azer de İsrael un Estado apartheid en kavzo de un anekso de la Sisjordania.” (fin de sitasyon)
Yitzhak Rabin no fue unikamente un grande politisyano, el fue un grande “Ombre de Estado”. El supo ver leshos, muy leshos.
