Kuatro dias en Göcek

Şeli GAON Judeo-Espanyol
30 Eylül 2015 Çarşamba

Antes un mez mos fuyimos por kuatro dias a Göcek kon la insistensya de unos amigos ke son komo ermanos.

Aleshar de esta sivdad ruidosa (gürültülü) ke las personas estan insensibles (duyarsız), los mansevos, las kriyaturas eskarados (arsız), no ay mas edukasyon en eyos, te estan chafteando kuando estas kaminando, no ay dizir pardon, no ay ekskuzarsen.

Komo de dor (nesil) esta oy!...

No se tyene visto i si keres avlar, vas a oyir mil vezes mas. El Dyo ke meta la mano…

Enfin, ya vinimos a un otel de ocho kamaretas, deshimos las chantas i pishin a la mar maraviyoza.

En el puerto (liman) de Göcek; munchas barkas asperando turistos para kaminar el dia entero en las aguas klaras i lempidas de kolor blu kon vedre.

En nadando se esta vyendo el fondo de la mar, los peshkados, las pyedras i objetos ke biven en las onduras de la mar.

Las islas de ‘Yassıca’, son unas islas muy chikas ke no tyenen nombres diferentes, no ay oteles no ay nada solamente una mar limpya ke se puede nadar kon grande guste.

La isla ‘Zeytinli’ se topa al sud de Yassıcalar. Es yena de arvoles de azitunas. Es la sola isla ke ay una atelye para apretar (sıkmak) las azitunas.

La isla ‘Tersane’ es la mas grande del golfo (körfez). Aki se puede ver las ruinas (kalıntı) de los gregos ke biviyan aki. Aki vyenen munchas barkas para protejarsen del ayre fuerte ke sale las noches.

La isla ‘Domuz’, ke se puede dizir la isla de ‘Prens’. Un tyempo aviya aki munchos puerkos salvajes (yabandomuzu).

‘Hamam Koyu’ un lugar enteresante ande puedemos ver allado de la eskala; las ruinas del monasteryo bizantino ke kedaron debasho las aguas. Aki era el lugar ande se aziya banyo Kleopatra.

Kaminar kon barka en Göcek, sintir el ayre fresko, ver la unyon de la mar blu kon la shara (orman) vedre es un privilejyo.

Unos kuantos dias mizmo es suffisante para trokar un poko, para eskansar i para vazyar la kavesa sin avrir los telefones ke mos estan kansando dia entero.

Bushkaremos la Verdad (hakikat); en el nasimyento de la natura i del mundo, en la ariskuridad de la noche, en el briyo de las estreyas, en las ojas vedres de los arvoles, en el guesmo (koku) de la roza, en las onduras de la mar, en el kante de aninar (ninni), en el yoro del muevo nasido i en la kerensya del padre.

Rosh-Ashana es el dia de la kreasyon i Kipur es el dia del djuzgamyento (yargı), de azer Teshuva (af dileme). Las personas rogan, demandan pardon del todo el Puederoso.

Topamos en la Verdad; la grandor, la eminensya (yücelik), el pueder kreativo (yaratıcı güç) del Dyo. Mizmo la muerte, es una realitad, es un konsepto de verdad ke se topa aryento del todo el Puederoso.

Agora, las fyestas Rosh-Ashana, Kipur i Sukot ya se terminaron kon entuzyasmo. Esperamos ke la mueva anyada sera para mozotros, una anyada yena de esperansa, sanedad, trankilitad i pas. Despues del mez de ellul, mez sakro yena de fyestas, una de detras de otra, va mos a tener un invyerno yelado, kon tyempos ariskuros.

Esta sezon mos da la posibilitad del desvelopamyento personal, seyga en iyindo a los teatros, filmos, ekspozisyones, seyga en iyindo a los konsertos, a diferentes kursos de lingua, u de pintura para pasar el tyempo en yeno.

Keridos lektores; el Dyo ke mos ayege para kada anyo, kon todos djustos, sanos i rezyos, azlaha i beraha, i pas en el mundo entero.

Ke todos muestros dezeos se afirmen!

Hatima Tova.

El Dyo syempre ke este kon mozotros. Amen…