Ay de esto dos o tres semanas, meldi un artikolo sinyado por “Henri Tinq” el kual mos dize ke un siglo despues Marx, Nietzsche i Freud, en los anyos entre 1960-1970, la konviksyon era kaji jeneral de toparmos en una era post-relijyoza, una era de ‘razonamyento syentifiko’ el kual es el solo ke puede ayegar a un estado de “kompleta laisidad”, ma ke portanto desde las primeras dekadas del XXIem siglo, vemos un konsideravle aumento de aktos kriminales inspirados por paragrafos obskuros de los Livros Santos de las tres grandes relijyones Monotheistas.
“En los payizes arabos el dezeo de libertad i de demokrasia de la fin del Venten siglo se undyo en el terrorizmo…los djihadistos topan en la “letra del Koran” un odyo indomptavle del “otro”.
“En la Evropa, grupos fanatikos paresen ser empapados de violensa kontra los homoseksuales i munchas vezes kontra estranjeros instalados sovre sus tyerras ke pensan otramente ke eyos”.
“De mezmo, en los territoryos palestinyanos okupados por İsrael se desvelopo una İdeolojia Mesyanika bazada sovre vyejos pasajes de la Biblia oy en dia absolutamente anachronikos, loskualos pushan djudyos ultra- ortodoksos a perpetrar aktos asasinos de violensa”. (fin de sitasyon)
El fakto es ke ekspresados en el lenguaje obskuro de los tyempos antiguos, en una atmosfera sosyo-kultural sin ninguna similitud kon muestro tyempo, syertos preseptos son meldados literalmente, ‘palavra a palavra’ i konsiderados de parte de los fundamentalistos komo komandamyentos imperativos de los Syelos.
Es triste muy triste de ver ansi las grandes relijyones de muestra epoka ser konsideradas komo fuentes de ideolojias kriminales i mozotros djudyos no puedemos evitar de formular la kestyon sigyente:”Eske la Biblia tambyen puede ser portadora de vektores de barbaria ?” kuando para munchos de muestros korelijyonaryos “Eya” reprezenta la baza mizma de la Ethika.
La realidad es ke topamos en la Biblia pasajes sublimes komo tambyen malorozamente pasajes ke pueden pareser obskurantistos i mizmo negativos….Eya i penso tambyen el Evanjilyo i el Koran deven se meldados (komo fue dicho mas arriva) ‘no palavra a palavra’ ma syempre kon un esprito avyerto ke va mas leshos ke la letra, en tomando en konsiderasyon la konjonktura sosyo-kultural de las varyas epokas en las kualas estos grandes Livros fueron eskritos.
En la ovra titulada “l’Histoire de l’Humanité” (6 grandes volumes editados por la UNESCO),Leonard Wolley dize:
“Entre los sistemas antiguos, solo el KodigoEbraiko aze de la relijyon “el fundamyento de la Ley Sosyal’, establesyendo ansi un kodigo moral imperativo...”
De su parte, el Profesor Henri Baruk, grande psikyatro Fransez del venten siglo, eskrivyo en su livro “La Bible Hébraique devant la Crise Morale du Monde d’aujourd’hui”: “La Tora reprezenta muncho mas ke un dogma o una relijyon. Eya reprezenta ‘una syensya kompleta del Ombre’ aplikada a una sosyeta entera... La Tora no neglija los instinktos i no los reprima ma los disiplina, pushada por la nesesidad de distingir ‘El byen del mal’, ‘Lo djusto del indjusto’...
Si, keridos lektores, es en la Biblia ke meldamos ke Dyo dize al benadam “Meti delantre tu puerta “el Bien” i “el Mal”; eskoje el “Bien”, dando ansi al ombre no solo un konsejo ma la responsabilidad de sus aktos…
Es Eya ke mos ambezo ke en el dezyerto el ‘Sinyor del mundo’ dyo a Moshe Rabenu “el Dekalogo” , kodigo de una absoluta moralidad sosyal, para ser transmetido a la humanidad entera.
De mezmo, es en este Livro Santo ke Adonay demando a Cain (Kain) “Ke izites de tu ermano ? dando ansi al ombre el ovligo de respektar la vida del “Otro ke si”.
İ no mos olvidaremos estas palavras de inspirasyon selesta del profeta İsaie: “…El Ayuno ke me gusta es Romper las kadenas de la indjustisya…Dezatar las ataduras del yugo…Liberar los ke estan oprimidos…Meter fin a todo modo de servidumbre. (Isaie 58/6-7)
