Arresiviendo el Anyo 5776

Coya DELEVİ Judeo-Espanyol
9 Eylül 2015 Çarşamba

Dizen ke Septembre es mesajero del Otonyo i mezmo adjustan ke es la fin del enverano. Portanto, i en este mez se bive diyas ermozoz. Espesyalmente, en la sigunda mitad del mez, Estambol bive el bulush de trokamiento de sezon. Antes de todo, las eskolas se avren, el trafiko puja, miles de pasharos migrantes se aparejan a abandonar la sivdad. Luvyas, ayres, ojas amariyas o ruvyas bolando por aki , por aya…Ay personas dizyendo ke esta sezon tiene tambien una relasyon kon la umor de la persona. La verdad ke no entyendo esto!!

Bueno,el mez de de Septembre, kon las luvyas, los ayres no es solo el mesajero del Otonyo. Komo lo dishe mas ariva, muy probavle ke va aver diyas ermozoz, diyas kon un sielo klaro. Lo mas importante, en este mez mos estamos aparejando a resivir el anyo 5776.

En estos diyas de Septembre, o mas egzaktamente, diyas de ELUL, pensi ke seriya mas djusto de eskrivir por las fyestas. El mez de Elul, entre otras, tiene la partikolaridad de ser el ultimo mez del Kalendaryo Ebraiko. Sintimos semana por semana, diya por diya asekarsen los Diyas Temerozos. Diyas nombrados komo “YAMİM NORAİM, una perioda de djuzgamiento, de arrepyentimiento o de regretos.

Tambien Elul, es dicho ser mez de oportunidad i konosido komo mez de piadad “HODESH HARAHAMİM” . En muestra İstoria los diyas entre el primo Elul i 10 de Tishri fueron una perioda de egzamen de konsiensa i de pedronansa. Oganyo, Septembre renferma una partida de Elul i de Tishri, mez de fyestas , de selebrasyones . Es el empesijo de una mueva anyada.

Durante el mez de Elul, el “Shofar” i las orasyones de demanyana moz azen akodrar ke “Rosh Hashana” i “Yom Kipur” estan aserkando. Akodrar…Komemorar… Komo lo savemos, uno de los prinsipales donos del “Judaizmo” es de akodrarse, es la memorya. El byervo “ZAHOR” es la yave de munchas mitzvot, de valores tradisyonal ke poseda el Puevlo Djudio. Una de las Mitzvot ke la TORA mos preskive por el Diya de Rosh Hashana, es de sintir el Shofar. A kada vez ke lo sintimos dizimos: Hayom Harat Olam”.

La Santa Biblia mos dize: “El primer diya del syeten mez selebraras una fyesta solemna…” Rosh Hashana, el empesijo del Anyo Djudio. Mos puedemos demandar, deke el syeten mez i no el primer, aun ke el Kalendaryo Djudio ampesa el primer diya de Tishri?.. Porke la vida del Puevlo Ebraiko ampeso kon la fin del esklavaje de Misraim, en el mez de Nissan. La libertad es la baza de un puevlo, de una nasyon.Tishri es el 7en mez a partir de Nissan.

Aki kero relatar una afirmasyon ke tomi de un manadero anonimo: “RoshHasana, literalmente la Kavesa del Anyo, es el Diya de Djustisya. Akodraremos syempre este prinsipyo ke fue establesido por los Djudios, antes miles de anyos. Libertad i Djustisia son las bazas, sin kualas dinguna nasyon puede egzistir”.

Estamos selebrando el evenimiento maraviyozo de la Kreasyon del Mundo. Sueto de todo korason ke la aynada 5776 seya manadera de favores divinas, de paz i repozo en el mundo entero. Amen.

SHANA TOVA- HAG SAMEAH.