Una vez mas tuvimos la suerte de topar bilyetos refuzados - orozamente... - despues de asperar delantre la entrada de la famoza Marina de Turgutreis, Bodrum, (main stage).
La noche de 18 Agosto
“A Symphonic Night with Buika”
Cumhurbaşkanlığı Senfoni Orkestrası / la Orkestra Senfonika Prezidental
Toni Cuenca / konduktor.
El shefe Toni Cuenca se surpaso. Su performansa de egzekutir un kurto pedaso demostro su ekstaordinaria posesion de jazz.
Komparada a Nina Simone, Chavela Vargas, Cesaria Evora, Edith Piaf, por los kritikos de arte, dizen ke BUIKA es una de las 50 vokalistas reputadas de muestra epoka. “The Voice of Freedom.”
Buika fue nominada al Grammy 2014, kon su album “La Noche Mas Larga”, al Premio “Best Latin Jazz Album”.
Entro en las listas de la Turkiya kon su boz “de velur arenoza” proprio a si, komo en munchos paizes del mundo.
Kon la emosion lirika de las palavras de sus kansiones, Buika supo reunir el jazz i el flamenko para krear una muzika renovatrisa.i maraviyoza.
Buika nasio en el 1 de Mayo 1972, en la Isla Mayorka-Espanya. Su padre imigro de “Ekvator Gine”, es un eskrivano politiko. Moravan en un kuartie prove ande la povlasion era Blankos...
Buika, la kuatrena ija de 6 kreaturas, se engrandesio kon su madre amoroza del jazz i el flamenco. Joven, pasava su tiempo en frekuentando las maales ande se kantavan kansiones.
Buika en uno de sus reportajes avia dicho:
“Keriya azer una kariera komo tamburista, ma en Espanya, dinguno keriya una mujer tamburista i me kansi de oyir no, no, no!”
No puediendo surmontar los prejudisyos, se transfero i gano su vida en kantando en los Bares de Madrid-en 1990.
Intento los kazinos de Las Vegas en los Estados Unidos, en 2000,.i retorno a Mayorka despues de unanyo i medio.
En su kariera, el 7en album se realizo djuntos kon el gitaristo Pat Metheny.
“Yo salgo en shena komo los gladiatores ke salen a la arena. Veremos lo ke va afitar, me digo. Amo improvizar - no es difisil de kantar, ay 7 notas kon diez bemoles... Mi verdadera tribu es mi audiensa. Kada vez ay una empatiya estranya entre eyos i yo.”
La nochada senfonika kon Buika fue inolvidavle!
