El Festival de Bodrum - Gümüşlük

“Europe For Festivals-Festivals For Europe” (EFFE) 2015 - 2016

Esti SAUL Judeo-Espanyol
12 Ağustos 2015 Çarşamba

Tuvimos el plazer de asistir al 12. Festival de Gümüşlük en la peninsula de Bodrum. Es un Festival Internasional de Musika Klasika.

 

La organisasion fue dirijada por la Asosiasion Bodrum Klasik Müzik Internasional, la Direktrisa, la pianista famoza i Art Konsultante nasional, GÜLSİN ONAY, i el Direktor, el pianisto EREN LEVENDOĞLU.

El festival resive reputados muzisienes i orkestras entre el 3 Julio - 8 Agosto. Este anyo va tener lugar 11 konsertos profesionales, 4 master-klasas, 4 konsertos de estudiantes i un konserto de kompetision.

En desparte, la 3. Kompetision de Piano. Ahmet Adnan Saygun.

Las performansas de munchos nombres de partisipantes puedemos nombrar: Anika Vavic, Ayşe Deniz Gökçin, Gilles Apap, Musician Kronos Quartet, The Karşıyaka Chamber Orchestra, Micha Davies i Martin Roscoe.

Un Konserto o Resital de Piano el 8 Agosto, de noche, en ayre libre, en Gümüşlük-Bodrum

La pianista Ayşe Deniz Gökçin mos enkanto.

Sin pretender pueder deskrivirvos el lugar maraviyozo, va aprovar a azer todo mi posivle.

La peninsula de Bodrum es grande. Es una ekspedision de deskuvrir lugares. Alkansimos despues de kaji una ora, por virajes, malgrado ke lo konosiyamos de antes. Kaminos kon arvoles de begonviliers, portakal, limon i mandalinas, a las alturas de la famoza crique (koy) de Gümüşlük.

Este lugar se empleya desde 12 anyos para los Festivales de Muzika Klasika. Es una karetera importante (taş ocağı) dezafektada. Es un plazer de estar asentados en este tereno de piedras i tierra. kon siyas blankas de plastic, i de kontemplar los blokes jiganteskos de piedras o de marmol mas de20 metros, iluminados del sol.

En alevantando la kavesa no solo se kontempla el sielo yeno de estreyas, ma los  mersielagos (yarasa) bolando i los cri cri (çekirge) alegres de akompanyar la muzika..

Entre los blokes disproporsionados aparese una vejetasion aklarada, vedre, i serka del sielo azul se desinan unos pinos pretos...

La NATURA ES UN ARTE DE MAJİA...

Orozamente pudimos gozar de la performansa de la pianista de 27 anyos  ke promete muncho: Ayşe Deniz Gökçin.

El piano a kola i mozos nombrozos, los amantes de muzika klasika, resivimos la ermoza, simpatika pianista kon su kara de riza, kon palmas.

Eya fina, kon fostan preto, kaveyos largos, tomo el mikro.

- Esto oroza de estar aki, en un lugar tan enteresante i de vervos a vozos. No me asperava a ver tanta djente.

Espero ke vos plazera lo ke va egzekutir. Rengrasio a todos ke me dieron esta posibilita de estar delantre de vozos, ke me gustaria konoser unos a unos. Rengrasio por siguro GÜLSİN ONAY ke me dio la oportunidad de vinir a la fin de este Festival...

Asentada delantre de su piano, mos demostro sus performansas i su repertuar kompozados de aranjemanes de Nirvana i Pink Floyd, ke fueron muy apresiados.

Munchas grasias a los organizatores.