La komunidad ‘Beta Israel’ en el Estado de Israel

Klara PERAHYA Judeo-Espanyol
10 Haziran 2015 Çarşamba

“The Times of Israel” de la semana pasada mos ambeza ke el primer ministro İsraelyano formo un komite espesyal para estudyar profundamente el problema de la integrasyon de los ‘Beta İsrael’ (falashas) i  partikolarmente de  egzaminar de mas serka  la atitud de la polisia  a sus sujeto.

El komite en kestyon es kompuesto de falashas komo tambyen de otros myembros de diferentes orijenes, kada uno avyerto al otro en un mizmo dezeo de absoluta “igualidad de derechos.”

A notar ke la palavra “falasha”es utilizada muy raramente de parte de los djudyos ke vinyeron de Ethiopia, loskualos preferan el termo “Beta İsrael.”

İze una chika enkuesta al sujeto de estos sitizanos İsraelyanos de kuero muy bruno, bushkida muy superfisyal de la kuala vos transmeto el rezultado:

El orijen de los falashas no es muy prechizo, varyas hipotezas son prezentadas. Segun una de entre eyas, los “Beta İsrael” vyenen del trivo pedrido de Dan, ma segun sus propya kreensa, eyos serian los desendyentes de los israelitos ke akompanyaron el Prens Menelik ijo del Rey Salomon i de la Reyna de Saba, kuando (en el dyezen siglo antes de la era moderna) la “Arka de la Aliansa” fue transportada en Ethiopia.

Asta el 17en siglo, eyos bivyeron libres  en el Norte de la Ethiopia, en estado de chikos  governos independentes, lado kon lado kon otros semejantes kristyanos; ma despues esta data, eyos fueron  konkuistados de parte del İmperyo del payis i devinyeron una minoridad segundarya  ke no tenia el derecho de poseder tyerras i ke era konsiderada  ser de mala augura.

Konsernando sus Fey, tanto ke se toparon en Ethiopia, los preseptos relijyozos de los Falashas eran diferentes de los de otros djudyos del mundo, sus kreensa era bazada sovre el Pentatoko ‘los sinko primeros livros de la Biblia’ i no sovre el Talmud. Eyos no eran sometidos a ninguna  Otoridad rabbinika  ni tenian kehilod, ma simplemente se rekojian en un lugar yamado “masgid” ande meldavan la Biblia i azian el sakrifisyo del kodrero paskual.

Los djudyos Ethiopyanos entraron en kontakto kon el Djudaizmo ke es el muestro, a la fin del dyezimueven  siglo i ansi, desde el empesijo del venten siglo, grasyas a Yehuda Halevi i otros grandes viajadores, se produzyo en eyos una evolusyon ke progresivamente los aserko del Djudaizmo Ortodokso, aun la prezensya de unas kuantas diferensyas ke ainda oy son perseptivles.

En el mundo djudyo ahuera de Ethiopia, desde la primera mitad del venten siglo un komite djudyo internasyonal se formo en favor de los ‘Beta Israel’, fundasyon ke kolektava moneda afin de avrir aya eskolas, en el objektivo de obtener  una mas grande evolusyon de los ninyos; i es ansi ke mas tadre, unos kuantos de entre eyos  pudyeron realmente evoluar i mizmo fueron introduzidos en institusyones djudias Evropeas.

Esta elite de falashas djugo un rolo importante en el fakto de  konsolidar en kaji la totalidad del puevlo ‘la sertidumbre de apartener al Djudaizmo’ i ‘el ovligo de abandonar varyas kostumbres inadekuadas a muestra relijyon.

Es ansi ke al empesijo del venten siglo i partikolarmente entre las dos gerras mundyales, la mayoria del Djudaismo universal fue favoravle a akseptar la idea de la identidad djudia de los falashas… El “Kongreso Djudyo Mundyal” i el “Joint’’ lavoraron en favor de esta thezis, i mizmo “Rav Kook” padre espiritual del movimyento sionisto relijyozo i Gran Rabbino de Palestina, los rekonosyo komo “djudyos” desde el anyo 1921.

Por kontra, a la epoka de la kreasyon del Estado de Israel, el Grande Rabbinato İsraelyano de la epoka  refuzo de rekoneser los falashas komo djudyos i ansi  los primeros Governos del Estado Hebreo no les akordaron el derecho de immigrar en Tyerras Djudias.

Es solo en el anyo 1973 ke la kestyon de la djudaidad de los  ‘beta İsrael’ fue de muevo formulada al Gran Rabbino sefarad ‘Ovadia Yosef’ el kual (en vertud de varyas afirmasyones relijyozas historikas) rekonosyo a su torno la  identidad djudia de los falashas i ansi, en Avril 1975, el Governo de “Yitzhak Rabin” aksepto ofisyalmente sus derecho a retornar i instalarsen en Israel.