Grasias a “HEGKOM” se realizo la Bat-Mitsva de un grande buketo de muestras ijikas. Eran 52 floras blankas en la Sinagoga: Neve Şalom, el 7 junio 2015.
Estavamos invitados grasias a mi inyeta. Momentos muy emotivos en la vida...
La seremonia organizada por “HAHAMBAŞILIK EĞİTİM KOMİSYONU”, estuvo perfekto. Una fiesta maraviyoza, kon la partisipasion del Gran Rabino, su Eminensia Haleva i la prezensia de İshak İbrahimzadeh.
Todas kon mizmo model de fostanes blankos, kantando kon la freskor i luzyor de la juventud. El kal entero kantimos djuntos...
Me akodro komo si fuera ayer...
Un savrozo bebe, kon ojos alegres de almendra, vino alegrar muestra famiya.
Siguro todo el tiempo no iva kedar el bebe de la fiesta de FIJOLA ke selabrimos...
No mos rendimos kuento komo pasaron los 12 anyos...
Tuvimos la suerte, antes anyos, de konoser el valutozo RAV ADONİ, ke mos konto sovre las fiestas muestras de Bar-Mitsva i izo profitar mis ijos kon su briyante konosensia de tekstos de muestra relijion...
No me refuzo i respondio a mis kestiones sovre la BAT-MITSVA. Me dio muncho gozo en kontandomos.
Felisito i rengrasio Rav Adoni por los esforsos umanos de saver aklararmos.
BAT MITSVA
En unos de los versetos de la Tora, en el sinken livro, ansi enkomenda el Todopoderozo a Moshe Rabenu:
“Kuando vinyere Todo Israel a prezentarse delantre Tu Dyo en el luguar ke El eskojera, Meldaras esta Ley delantre de Todo Israel a oyidos de eyos, Varones, i Mujeres, i Ninyos.”
Los komentaryos eksplikan este verseto dizyendo:
“Los ombres por embezar, las mujeres por sintir i los ninyos por ke tengan merito sus jenitores.”
Dunke, seya Varones, seya Mujeres, tenemos el dover de estudyo de la Ley.
Una ijika ke ya kumplyo los 12 anyos, sigun muestros savyos, ya es konsiderada komo una persona entendida, por el estudyo relijyozo ke toma unos kuantos anyos, komo la Estorya Judiya, los Doveres de la Mujer entre la Famiya, i en la Kolektividad. En fyestando la fyesta de Bat Mitsva, mostra a sus paryentes ke eya va ser syempre una persona provechoza a su Famiya i a su Komunidad.
Dizde munchos anyos fyestamos en nuestra Komunidad kon grande alegriya esta ermoza fyesta.
Ma ya es savido ke en los anyos antigos no se fyestava esta fyesta, pero kada madre ya las elevava a sus ijas en kamino de la Tora.
Tomando nuestras ijikas este estudyo kolektivamente, i fyestando sus fyestas todas endjuntas, se embezan tambyen de tener estima una kon otra i ayudarsen uno kon otro.
Rav Yeuda ADONI
